Labing yanong panagang
Palihug magtinabangay ta og bantay. Samtang nagpakabana ang kasagaran sa mga molupyo sa pagpanagang sa nagsulbong nga mga kaso sa dengue, may pipila ka opisyal sa gobiyerno nga magpahimus sa nasudnong pangandam sa dengue nga gideklarar sa Department of Health (DOH).
May mga kurakot nga magpapating na sab og pangompra og mga kemikal alang sa way kapuslanan nga fogging ug mist spraying.
Bisan napamatud-an na nga ang pagpanlimpiyo sa palibot ang kinakusgan nga panalipod gikan sa dengue, mas dako ug matentalon gihapon ang komisyon sa mga kemikal kay sa mga silhig.
* * *
Sa sunod higayon nga maka-atol ka og taga-gobyerno nga mo-insistir gihapon og fogging ug mist spraying, palihug pahinumdomi sila sa di malalis nga kamatuoran: Sa di pa sila kapasirit og kemikal, manglupad na palayo ang mga lamok ug mahimo ganing mamalhin sa mga dapit nga nakalingkawas na unta sa dengue.
Nganong maglibug-libog pa man gyud? Labing mahinungdanon ang pagguba sa tanang posibleng ka-itlogan ug kasanayan sa mga lamok. Nga yanong mahimo pinaagi sa pagyabo sa napasagdang mga sudlanan sa tubig ug paghawan sa nabarang mga kanal ug sapa.
* * *
Ubang mga lakang sa gobiyerno napamatud-ang pakyas pagbadlong sa dengue:
• Pagbutang og larvicide sa mga tubig sa mga botelya ug kanal sa mga eskuylahan (mas sayon ang nahisgutan sa ibabaw, apan di kaginansiya ang nag-negosyo sa larvicide);
• Pagbutang og moskitero sa classrooms (mas sayon ang nahisgutan sa ibabaw, apan way maka-komisyon sa moskitero); ug
• Pagpasul-ob sa mga tinun-an og long sleeves ug long pants (mas ganahang mga lamok mopaak sa ilang aping ug nibalik nang ka-alimuot kay nihinay ang habagat).
* * *
Mas dakong kadaot nga nahimo sa fogging, mist spraying, larvicide, moskitero ug ubang lipat-lipat: Nakahatag sila sa mga tinun-an sa mga eskuylahan ug mga molupyo sa kabaranggayan sa sayop nga seguridad nga luwas na sila sa dengue.
Mao nga di na hinuon sama kakugi ug kamatinud-anon ang pagpanglimpiyo sa palibot, pagkaob sa tanang naghayang nga kapundohan og tubig sa sud ug gawas sa classrooms ug kabalayan, pagpadagan o paghawan sa tanang natanggong nga mga kanal ug sapa ug pagtawag sa atensiyon sa mga silingan nga may nataligam-an nga posibleng mga itloganan sa mga lamok.
* * *
- Latest
