Nahanaw nga ambisyon

Sa katapusan, nahanaw gayud sama bula ang ambisyon ni kanhi Cebu Governor HIlario Davide III nga matukod pa ang dakong proyekto niyang Cebu Provincial Resource Center diha mismo tapad sa Capitol building.

Unang adlaw pa lamang paglingkod sa bag-ong gobernador nga si Gwendolyn Garcia, tulin pa sa alas kuwatro ang iyang order paghunong sa maong proyekto. Sayang tungod kay dako na ang agi niini. Gani lawom na ang pagkalot sa maong kontraktor.

Daan nang nanganti si Garcia nga iyang undangon ang maong proyekto inig asumer niya sa katungdanan. Maghatag lamang kuno kini og mantsa sa nindot nga imahe sa Capitol building nga usa ka heritage site. Usa pa makalapas usab kuno ang maong proyekto sa balaud nga nagprotehir sa mga kaarang edepisyo.

Lisod na nga mabangon pa ang maong proyekto. Gani gusto sa bag-ong gobernador nga ipadayon gayud ang kaso batok niadtong nagpaluyo niini.  Ug naag-una sa gikasohan mao ang kanhi gobernador.

Sipyat si Davide tungod kay nganong sa naghinapos na lamang sa iyang administrasyon siya nangusog sa iyang tinguha pagtukod sa maong resource center nga kahibalo na siyang mapurnada gayud kini inig-take over sa sunod nga administrasyon.

Kay kun sa unang termino pa niya kini giplano ug gisugdan, wala untay makababag sa implementasyon sa maong resource center. Ug tulin pa usab unta sa jet plane ang katukoran niini. Siguro human na ug mapahimuslan na unta kini karon.

Karon, lig-on gayud ang baruganan ni Garcia batok sa maong proyekto. Aw dili gayud kini kalikayan nga mapurnada ang kamada. Nahibalo na kita nga grabe ka kontra sa pulitika ang gobernador ug ang kanhi gobernador.

Hinuon realidad na dinhi sa nasud nga basta magkabangi gani sa pulitika ang atong mga lideres sa pangagamhanan, mga proyekto, programa ug ubang serbsiyo ngadto sa katawhan gayud ang maapektohan.

Kinsa ang maalaut? Aw wala nay lain kondili mismo ang katawhan. Ug niining isyu sa proyekto sa resource center, dako gayud nga usik kini sa salapi. Kinsa ang manubag niini? Kadto bang nag-ugmad o kadtong nagpahunong.