Siege sa Port of Cebu

Gipahimuslan ni Customs Commissioner Rey Leonardo Guerrero ang sick leave ni Atty. Elvira Cruz, district collector sa Bureau of Customs sa Port of Cebu. Kini human ang Commissioner mitunga sa Bureau of Customs sa Port of Cebu niadtong Lunes dala ang mga Customs Police ug Coast Guard nga nagdala og tag-as nga mga armas ug gipapanumpa isip bagong district collector sa nahisgotang buhatan si Atty. Charlito Mendoza.

Nahingangha na lamang si Cruz sa iyang pag-abot sa opisina aron na unta motrabaho dihang wala kini pasudla sa mga nagbantay nga police nga gikan pa sa Manila nga nagdala og tag-as nga mga armas. Tungod sa kabalaka ug seguridad sa iyang kinabuhi wala na lamang mopugos sa pagsulod sa iyang opisina si Cruz.

Sigun sa akong nahibaw-an, gusto nga ibutang ni Guerrero sa floating status si Cruz aron iyang mapahiluna ang iyang tawo human siya molingkod isip bagong Commissioner sa Bureau of Customs.

Apan gikwestiyon kini ni Cruz atubangan sa buhatan sa Civil Service Commission. Ang Civil Service Commission mipabor ni Cruz ug mipagawas og Status Quo order. Wala matuman ni Guerrero ang iyang kagustohan.

Niadtong Lunes gipugos na ni Guerrero ang pagpatuman sa iyang kagustohan nga mailisan sa iyang tawo si Cruz ug iya kining giatol sa panahon nga wala sa iyang buhatan si Cruz kay naka sick leave.

Sa iyang paglingkod isip district collector sa Bureau of Customs sa Port of Cebu, wala ta makadungog og reklamo nga mga anomaliya batok kang Cruz. Walay nagbagolbol nga mga importer ug exporter nga gilangay-langay sa pagpagawas ang ilang mga dokumento aron sila padug-on.

Hinuon mipaspas ang dagan sa transaksiyon sa Bureau of Customs. Nag-surplus usab sila sa collections gawas lang sa mga buwan nga hinay ang pag-abot sa mga kargamento nga gikan sa gawas. Tungod niini naglibog ko sa patakaran sa nahisgotang buhatan.