Bag-ong termino

Pormal na nga nagsugod niadtong Lunes ang opisyal nga trabaho sa mga napiling opisyales kaniadtong eleksiyon sa Mayo 13. Kini human sa ilang pagpanumpa sa ilang katungdanan, kansang termino nagsugod pagkamang kaniadtong Domingo sa udto.

Tulo ka tuig na usab ang sagubangon niining mga bag-ong opisyales sa probinsiya, lungsod ug dakbayan. Ug ako gayud ang gipaabot sa katawhan kanila, nga unta maayo ang ilang pagdumala sa ilang katungdanan.

Hinaut nga kinasingkasing gayud ang pag-alagad sa mga bag-ong opisyales. Hinaut nga ligdong ang ilang tumong pagserbisyo sa ilang mga konstituwente, kinsa mibutang kanila sa posisyon sa pamasin nga makahatag sila og kaayohan sa dakbayan ug lungsod.

Dili nato ikalimod nga adunay uban nga nagpakaaron-ingnon nga moserbisyo sa katawhan sa tinuoray apan diay personal nga interest lamang ang ilang gituman.

Mao kana sila kadtong mga hakog sa gahum nga dili tinud-anay ang pagserbisyo.

Hinuon dili na kana ikatingala pa dinhi sa nasud. Sukad pa man kaniadto daghan sa lokal nga mga opisyales ang wala gyuy nabuhat sa dakbayan ug lungsod tungod lagi kay dili makamao nga moserbisyo sa katawhan.

Napili lamang kining maong mga opisyal gumikan sa salapi nga ilang gitingal ngadto sa mga botante. Ug tungod kay gusto lagi nga mamawi sa dakong nagasto panahon sa piniliay, bahandi sa katawhan maoy ilang gipahimuslan.

Daghan kanato ang nagtuo nga susama ra gihapon ang kamada sa hut-ong sa mga bag-ong napiling opisyales. Ug ambot kun kanus-a maayo kining maong sakit nga hagbay rang mitapot sa atong pulitikanhong kultura.

Hinuon dili usab tanan.

Adunay napiling lideres nga tinud-anay gayud ang ilang pagserbisyo sa masa. Sila mao kadtong nag-ugmad og daghang proyekto ug programa sa ilang lokalidad.

Ug hinaut nga daghan kanila ang napili sa nakalabay’ng bugnong lugaynon.