Dungis sa PNP

PANIBAGONG dungis na naman sa Philippine National Police ang nangyari kay P/Maj. Raul Salle, deputy chief ng PNP Highway Patrol Group-Operation Management Division. Na-entrap siya sa loob ng opisina niya sa Camp Crame matapos tanggapin ang marked money na iniabot ng nagreklamong OFW. Pinosasan siya at binitbit ng mga pulis patungo sa headquarters ng Integrity Monitoring and Enforcement Group (IMEG).

Susmaryosep! Hindi pa ba siya kuntento sa limpak-limpak na suweldo? Tiyak na malulusaw ang mga benepisyo ni Salle maliban na lamang kung maareglo o malusutan niya ang kasong kinahaharap.

Ayon kay IMEG director P/Col. Romeo Caramat, lumapit­ sa kanyang tanggapan ang isang OFW na taga-Pasay upang ireklamo ang pangingikil ni Salle ng P420,000 kapalit ng pag-release ng na-impound na Mitsubishi Adventure.

Ayon sa OFW, nang makarnap ang kanyang sa­sak­yan inireport niya ito sa HPG, pero hiningan agad siya ng P140,000 para sa paunang imbestigasyon para mahanap ang kanyang sasakyan. Inutusan daw umano siya na humiram muna ng P70,000 sa isang non-uniformed personnel na nakilala lamang niyang “Alex”. 

Ang masaklap, humirit muli si Salle. Kinumbinsi siya na isangla na lamang ang kanyang sasakyan upang mapunan lahat ang gastusin. Hanggang sa mapuno na ang OFW at nagsumbong kay Caramat. Ikinasa ang entrapment operation at nayari si Salle! Ayon kay Caramat, marami pa palang kabulastugang ginawa si Salle.

Sa mga bugok sa PNP, kalimutan na ninyo ang gawaing masama. Ang tinatamasa ninyong mataas na suweldo ay suklian n’yo ng tapat na paglilingkod sa sambayanan. Gets n’yo?