Abilidad nga masayang

Sa paglingkod sa bag-ong administrasyon sa Hulyo 1, daghan kaayo ang maapektohan nunot sa mga kabag-ohan nga naandan, bag-o kay mag-ilis naman og mga opisyal apan ang sistema ang daan nga mao gyuy mahitabo inig mapulihan ang mga namunoan.

Ang labing apektado gyud ang mga yanong empleyado nga maamong sa pamolitika inig hawa sa ilang amo silang tanan mapapha.

Bitaw sakit nga kamatooran apan kinahanglan dawaton sa mga maapektohan.

Sa Cebu City Transportation Office pananglitan adunay 400 ka mga kawani apan maihap lang sa tudlo ang regular.

Nagpasabot kadtong uban nga casual aw mamutos pud kay basin sila maapil sa pagkawagtang sa serbisyo.

Pwera sa mga badlongon, anugon baya nga mawagtang sila kay ang mga kasamtangan nga traffic enforcer ang nasayod sa angayang buhaton sa pagpahapsay sa kadalanan.

Kung wagtangon sila o ba kaha ilabay sa laing trabaho anugon ang ilang katakos nga nabansay na.

Ok ra man unta nga mokuha og laing mga moserbisyo sa karsada apan gikinahanglan pa silang magkat-on.

Dili overnight ang pagkat-on sa mga pamaagi unsaon pag-manage ang daghan nga mga sakyanan nga moagi sa gamay ug huot nga mga karsada sa dakbayan.

Crucial kaayo ang ilang trabaho busa kon haum sila sa ilang position karon angayan seguro nga ipabilin sila sa serbisyo.

Hinoon ang bag-ong namunoan man ang magbuot kinsa ang angayan nga modumala sa mga buhatan.

Basin diay makahatag sila og mas maayo nga serbisyo sa katawhan.