Binalhinay sa kaparian may luha

Dili lalim ang bation sa usa ka amahan kun siya makadawat og office order sa iyang trabahoan, nagpahibalo nga ibalhin siyag destino sa lain nilang sangang buhatan nga atua mahimutang sa halayong dapit. Kay ultimo ang dahon nga mapungil sa gitaptang sanga, motulo man gani ang mga luha, unsa na kaha ang tawo nga may balatian?

Mao sab kini ang gibati halos sa tanang kaparian, kinsa sa miaging Hunyo 14, gipahibalo asa ang usa’g-usa nila ibalhin ug ikatag pagdestino sa 130 ka parokya sa 7 ka distrito ug archdiocesan commission ning umaabot Agosto 6.

Order ni Arsobispo Jose Palma nga kinahanglan tanang pari nga madestino magdungan gyu’g report ngadto sa bag-o nilang parish assignment sa maong adlaw, diin inig ka alas 10:00 sa buntag, ipahigayon ang una nilang engrandeng welcome home mass.

May mga luha sa kawili ang dili gyud mapugngan sa pagpangahulog samtang magsud-ong ang mga parokyano sa walay ligo nga simbahan kanhi nga gipaguwapa sa mga Team of Pastors, kinsa kasamtangang maoy midumala sa Archdiocesan Shrine of Our Lady of Guadalupe de Cebu.

Ang pag-awhag sa katawhan nga Cleanliness is next to Godliness, ang pagpangitag paagi unsaon pagbayad ang nahabiling minilyong utang sa natukod nga kombento, ang pagpanindot sa parish parking area ug ang pagtukod og columbary nga sa nangaging kaparian wala gyod makalusot tungod sa daghang mipugong.

Pipila lamang kini sa mga bulawanong tunob ug handumanan nga ibilin sa mga outgoing Team of Pastors, nilang: Fathers Manuel Tan, Romeo ‘Dodong’ Desuyo, Joeryll Chan ug Henry Bascones sa nagmasulob-ong kasingkasing sa mga Guadalupenganhon.

Nilang upat, may masinaboton, very approachable, istrikto, disciplinarian, kugihan, prangka, manggiluy-on ug neutralizer. Hinungdan, nga napalambo nila ang Guadalupe Parish Church sulod sa tulo ka tuig nilang pagpangamahan. Usab, nakat-on ang mga parokyano sa paghigugma kanila.

Gusto unta sa Guadalupe Parish Pastoral Council nga dili na molihok ang mga tudlo sa taknaan. Buwahan, wala nay Agosto 6 nga moabot ug magpabilin sila nila.

Apan kinsa bay makapugong sa pagdis-og sa panahon? Mobutho gyod kining adlawa. Ug igo na lang unya sa pagpatulo sa mga luha ang mga parokyano dungan ang pagtuaw: “Bye, Fathers. Thank you for everything.”