Buhis ayuhon pagkolekta

Ang Bureau of Local Government-Finance (BLGF) nag-ingon nga ang buhis, ilabi na ang gitawag og real property taxes, maisip nga “lifeblood” sa kagamhanan. Kon walay buhis nga makolekta, dili makalihok ang gobiyerno.

Ang gobiyerno mangolekta og buhis aron nga gamiton sa pagpatuman og mga proyekto nga kapahimuslan sa katawhan, sama sa karsada, pantalan, airport, garbage collection, ug uban pa.

Gilatid sa Local Government Code nga ang real property tax rates, kinahanglang usbon kada tulo ka tuig, nga sa ato pa, pausbawan ang iyang kantidad. Apan wala kini himoa sa kadaghanang LGU, apil na sa dakbayan sa Sugbo.

Mangutana mo og ngano? Ang mga opisyal mahadlok nga kon ila kining himuon, masuko kanila ang mga taxpayers ug dili na unya mobotar kanila. Sa ato pa, nagpasuwabi ang kahakog sa gahum. Apan unsa ba kining gitawag og real properties? Kini mao ang yuta, building ug mga makinarya, sama sa elevators, escalators, generators sets ug uban pa.

Dinhi sa dakbayan sa Sugbo, imbes nga dako unta ang makolekta sa buhis gikan sa real properties kay nanuyhakaw man ang daghan ug tag-as kaayong mga building nga kompleto sa elevators ug escalators, apan mas dako ang nakolekta gikan sa business taxes.

Sa ato pa, klaro kaayo nga wala mamaayo sa pagkolekta ang atong buhis gikan sa real properties. Tan-aw nako, bisan og dili nato usbawan ang tax rates sa real properties, dako gihapon kaayo ang makolekta kon agresibo lang unta nga mangolekta ang atong tagdumala sa siyudad.

Ang atong tax rates gibase pa kini sa karaang tax rates nga nahimo mga 20 ka tuig na ang nakalabay. Sa ato pa, pwerteng gamaya pa gyud tawon.

Karong bag-o, gibutyag sa City Assessors Office nga may kolektahonon sila sa VECO nga kapin P200 milyones nga wala pa kabayri nga real property taxes.

Andam man nga mobayad ang VECO niining maong kantidad, apan ang gipaabot lang nila ang hukom sa Energy Regulatory Commission kon ang maong kantidad mahimo ba nilang ipasa kanatong mga konsumedor.

Unta ang administrasyon ni incoming Mayor Edgardo Labella mohimo gyud og agresibong kampanya aron sutaon kon ang tanang balay-patigayon dinhi sa siyudad nagbayad ba sa tukma nga buhis, gikan sa business tax, real property tax ug uban pa.

Bisan kining mga imnanan, daghan ko og nakit-an nga wala gyud magbayad sa tukmang buhis. Kon namaligya sila ug nagpainom og mga beer, kinahanglan sila nga molukat og Permit to Sell and Serve nga magtugot nila hangtud lang sa alas 10 sa gabii.

Kon mamaligya sila lapas sa alas 10, magkinahanglan sila og Permit to Operate Beyond 10 o’clock. Dili ba makadugang na unta sa koleksyon kon ipatuman?