EDITORYAL - Bangkok Declaration

Upat ka mga nasud nga sakop sa Association of South East Asian Nations (ASEAN) ang naapil sa top 5 ka mga nasud nga nag-una sa paglabay og basura sa kadagatan ug nakatampo sab sa ubang matang sa polusyon sa kalikopan. Ang upat mao ang Thailand sa ikalima, Vietnam sa ikaupat, Pilipinas sa ikatulong pwesto ug ang Indonesia sa ikaduhang pwesto. Ang nag-una sa tibuok kalibotan mao ang China nga tiglabay og plastic nga basura sa kadagatan. Ang tanan pulos naa mahimutang sa Asya.

Ang 2017 Ocean Conservancy nag-ingon nga ang maong mga nasud naglabay og otso milyones ka toneladang plastik nga basura sa kadagatan kada tuig.

Ang maong mga basura dili lang sa ilang kadagatan nanglugdang kondili gianod sab kini sa sulog ngadto sa ubang mga nasud ug nakaapektar sa ilang marine ecosystem didto.

Tungod niini, miani og mga pagsaway ang mga lider niining mga nasura kay kuwang ra kaayo ang ilang aksyon batok sa plastik nga basura ilabi na ang single-use plastic.

Sa ASEAN meet nga nagsugod kagahapong adlawa didto sa Bangkok, Thailand, gikatakdang mopirma sa “Bangkok Declaration” ang mga miyembrong nasud apil ang China aron batokan kining pagtam-ok og basura diha sa kadagatan. Apan ang pangutana, may pisikal ba kahang aksyon nga himuon kining mga nasura? Ang Pilipinas adunay Solid Waste Management Act ug daghan pang mga environmental laws nga nagprotektar sa kinaiyahan, apan kutob ra sa papel.

Hangtud karon mas daghang establisamento ang nigamit og single-use plastics ilabi na ang mga fastfood chains ug groceries. Menus kaayo ang implimentasyon tungod sa pamolitika, mag-iyahay ra og palusot ang mga lokal nga mga opisyal aron masilbihan ang ilang personal nga interes ug mga padrinong negosyante nga nagpadato kanila inay nga para sa katawhan ug sa kalikopan.

Magmalampuson lamang ang Bangkok Declaration kun ang tagsa-tagsa ka mga nasud mopanday og mga lig-on nga balaod nga may kaubang bug-at nga silot batok sa mga malapason.