Merida ni Jerome

Dunay batos si Mam Aylin Parado iyang ngalan si Jerome nga taga Tigbawan. Si Jerome kuno nangutana kun unsay maayong musika ang tugtoton kun ugaling siya wala na. Gani nidulog pa siya sa iyang mama kay lagi basin dili na sila magkuyog pa.

Namista siya sa Olivo apan gidid-an kay gabii naman kaayo. Apan nilighot siya kuyog sa laing kauban. Ug niadtong gabhiona nadisgrasya siya ug dead on the spot samtang ang iyang kauban nagkabali bali ug gidala sa Vicente Sotto Hospital.

Anang adlawa kuyog silang Jerome ug husto siya nga tingali dili na sila magkakuyog pa. Mao kadto ang merida ni Jerome.

Merida. Kini ang kasagaran nga isulti kun ang usa ka tawo mohimo og mga lihok ug mga pagbungat og mga pulong sa panamilit. Gani ang uban buot mopadayag nga kuno masumpa ang maong kun hapakon ug badlongon ang maong tawo dungan ang pag-ingon og simbako palayo.

Ang pangutana mao: mapungan ba gud ang kamatayon ug makalikay ba kita niini? Ang tubag dili. Kini tungod kay gilatid man daan sa atong kinabuhi nga dunay kinutoban.Ang merida nagpahinumdom kanato nga kinahanglang atong saulogon ang matag adlaw natong panagkuyog.

Lisud tugkaron kining maong kahimtang. Si Jerome sa iyang kaugalingon may kasayuran ba kaha siya nga kadto na lang ang iyang adlaw? Wala ba kaha to niya tuyoi? Apan lisud pud ingnon nga iyang gituyoan ang iyang kamatayon.

Hinuon ang kahigayonan nitanyag sa iyang pagbulig. Kun wala pa gyud unta siya molakaw uyg nagpabilin na lang sa ilahang pinuy-anan unta, walay dautang nahitabo kaniya. Apan bisan pa tingali kun unsaon nato og paningkamot nga kita mabuhi og dugay apan kun diha na lang kita kutob wala gyud kitay mahimo.

Ang merida sabton nato ingon nga positibong paagi sa pagpadayag sa atong gugma ug pagbati sa usag-usa. Ang hustong panahon sa paghigugma karon gyud adlawa kay ang ugma wala nay kasegurohan. Alang kang Jerome unta siya mopahulay na sa kalinaw.

Kalit man tuod ang iyang kamatayon apan nagbilin siya og lama nga molungtad diha sa kasingkasing ug hunahuna sa iyang pamilya.