EDITORYAL - Balimbing

“My loyalty to my party ends when my loyalty to my country begins,” mga linya nga gibatbat ni kaniadto Presidente Manuel L. Quezon nga karon pipila nalang ka lugas sa mga politiko ang nagtamod.

Kadaghanan naapil sa gitawag nga mga ‘balimbing.’ Karong mga semanaha sa dili pa pormal nga molingkod sa bag-ong mandato ang mga nakadaog nga kandidto sa nakalabay nga piniliay, dunay mamalhin og partido ilabi na sa partido sa administrasyong Duterte.

Niadtong 2016 elections ug nakadaog si Duterte naglumba panglayat ang mga bag-ong elected officials ngadto sa partido sa presidente nga Partido Demokratiko Pilipino-Lakas ng Bayan (PDP-Laban).

Dili na kini bag-o sa politika sa Pilipinas. Nasyonal man o lokal ingon niini ang kinaiya sa mga politiko karon. Dali ra kaayong mosalikway sa ilang gipanumpaan nga pagsuporta ug pagpalambo sa ilang political parties nasyonal man o lokal. Dinhi sa Pilipinas ang ‘loyalty’ sa mga politiko mag-agad na sa ilang panginahanglan sa pagsugod nila og lingkod sa ilang pwesto ug labaw sa tanan ang proteksyon sa ilang personal interest.

Samtang maot kaayong paminawon ang politikong balimbing, duna sab kini maayong bunga para sa ilang mga konstituwente.

Kay kadtong namalhin sa partido sa kasamtangang administrasyon sigurado mas paminawon nungka sa taga oposisyon. Maayo sab kini sa personal nga interes sa politikong balimbing tungod kay kaalyado man sila kinagamhanang opisyal sa nasud.

Maot lang gyud paminawon kay mura og traydor ang maong politiko, apan kun tan-awon gyud og maayo ug tinambanon ang mga pulong ni Manuel L. Quezon may makuhang kaayohan ang katawhan gikan sa mga balimbing nga politiko.

Tungod kay husto man si Quezon, kun magsugod na gani ang politiko pagserbisyo kinahanglang nag-una sa iyang palabihon ang kung unsay makaayo para sa kinabag-an sa iyang mga konstituwente.

Ang negatibong pagtan-aw nalang sa publiko maoy problema ug kinahanglang mapasabot og maayo sa politikong balimbing. Basta ang importante maserbisyohan nila ang katawhan.