Bisan pag unsaon nimo

Daghan Sa mga tawo ang maningkamot gyud nga mamahimong mga buotan ug tarong ngadto sa ilang isig-kaingon. Dili sila buot nga makahimo og bisan unsang makapasakit sa uban.

Apan bisan pag ingon ini ang atong mentalidad daghan sa mga tawo ang nahimong dili magsapayan. Gani, nahuptan nila ang kaisog nga bisan gani ang mga tawo dili maantigong mosagang sa ilang mga patotsada sa facebook. Padungog dinhi ug padungog didto.

Bira dinhi ug bira didto. Ang uban kun dunay gihambing sakit nga emosyonal ang mohimo dayon og post sa ilang gibati. Daghan pud ang mokomentaryo nga usahay maoy hinungdan sa dakong gubot ning kalibutan.

Dili nato malipay ang tanan. Kamatuoran kini kay bisan gani ang mga laksot ning nasura hinawayon naman. Ang mahinungdanon mao nga matinud-anon kita sa atong kaugalingon. Dili maayo nga magsalig lamang kun unsay komentaryo sa ubang mga tawo. 

Mao nga ang akong higala akong giingnan nga bahala na og magpunay sila og saway nimo ang mahinungdanon mao nga malipayon ka sa imong mga buhat ug naghatag kini kanimo kalinaw. Kay diha sa atong panaw atong hinumdoman ang tulo ka mga K’s.  Kinabuhi, Kalipay, Kalinaw. Ang kinabuhi nato atoa ug dili sa uban.

Way rason nga atong iangkla sa uban ang atong kaugmaon o ang atong direksiyon. Ang Kalinaw mas mahal pa kaysa bisan unsang bahanding material.

Mag-unsa man tuod ang imong kalampusan kun dili ka malipayon? Dili ba impiyerno gihapon ang imong kinabuhi? Mag-unsa man tuod ang imong balay nga mansiyon kondili panimalay ang nipuyo niini? Di ba sayang kaayo ang tanan? Ang kalipay ingon nga panaw angayan lamang nga atong gambalayon dili kay atong paabuton nga moabot s atong kinabuhi. Ang kalipay mahinungdanon kaayo nga atong ipaambit usab sa uban ug dili lang tipigan.

Bisan pa man kun ang ubang tawo dili modawat kanato angay gihapon kitang magpasalamat kay dunay mga tawo nga nidumili sa ato pa kita diay ni exist kay ila man kitang gibalibaran.

Mas malisud pa kaayo ang mamahimong masagol sa mga indifferent people nga walay pakialam sa atong presensiya. Apan bisan pa man ning maong kahimtang angay gihapon kitang magpasalamat kay diha sa ilang pagdumili pagdawat kanato mas makaplagan pa nato ang mga tawo nga haum ug sibo gyud sa atong panghunahuna ug prinsipyo. Just be yourself!