Mga tigbantay sa Spratlys
Sa pagbuak sa iyang unom ka adlaw nga pagpakahilom sa bangga sa mga barko sa China ug Pilipinas sa Recto Bank aron lang pagsalikway sa pangangkon sa Pilipinhon nga mga mangingisda nga tuyo silang gibanggaan, way nakahunghong ni Presidente Rodrigo Duterte nga ang naminaw niya mao ang mga sundawo nga tigbantay sa West Philippine Sea ug busa labing suhito sa pagpanghasi sa China.
Mga sakop sa Philippine Navy, kansang ika-121 nga anibersaryo maoy gitambongan sa presidente niadtong Lunes, ang nagsakripisyo pagbantay sa Pag-asa ug ubang mga isla nga gi-okupahan sa Pilipinas.
* * *
450 ka Pilipinhong mga sundawo ang nagbantay sa walo ka isla ug tulo ka higanteng gasang sa Spratlys: Pag-asa Island (37.2 ka ektarya); Likas Island (18.6 ka ektarya); Parola Island (12.7 ka ektarya); Lawak Island (7.9 ka ektarya); Kota Island (6.4 ka ektarya); Patag Island (0.57 ka ektarya); Panata Island (0.44 ka ektarya); Rizal Reef; Balagtas Reef; ug Ayungin Reef.
Tungod sa kalisod ug kalaay sa ilang kahimtang, pulihan sila matag usa ka buwan, dungan sa paghatod sa bag-ong suplay sa tubig ug pagkaon.
* * *
Ang Pag-asa mao ray gipuy-an og mga sibilyan (sa kataposang ihap niabot og 300) ug gibantayan og 40 ka sundawo.
Ang ubang mga isla may mga payag-payag nga mga sundawo ray nagtikaw-tikaw.
Niadtong 1999, gituyo pagsangad ang BRP Sierra Madre sa Ayungin Reef ug BRP Benguet sa Panatag (Scarborough) Shoal. Tungod sa protesta sa China, gipakuha ni kanhi Presidente Joseph Estrada ang Benguet sa Panatag apan gipasangad na sab (ug nagpabilin hangtod karon) sa Pag-asa.
* * *
Kasagaran nila mangaliya nga may bagyo o bunok sa uwan aron makasawod og tab-ang nga tubig.
Apan bisan sa pait nga kamatuoran nga ang ilang mga riple ug granada di makalahutay pagsukol kon atakehon sa China ug ubang kanasuran ang ilang mga isla, isog ug determinado sila nga nagbantay sa tungatunga sa kawalaan kay mao man ang ilang tahas.
Palandonga unsa ang ilang gibati dihang giingnan sa commander-in-chief (nga nauwahi og upat ka oras) nga inutil sila, bakakon ang mga mangingisda nga nangangkon nga gibanggaan samtang nangatug ug, sama sa naandan, sakto ang China.
* * *
- Latest
