Ang tinuod nga kagawasan

Daghang mga tawo ang nalipay labina kun Independence Day. Kini tungod kay wala may trabaho ug matag usa dunay kahigayonan nga mopahuway o dili ba kaha musoroy suroy ug maglulinghayaw. Apan lahi ning panahona karon. Bisan pa man kun maglaag-laag ang matag usa kanato apan  sa hilom tingali daghan nato ang buot gyud nga mamahimong gawasnon. Kay unsa man diay buot ipasabot niini? Matud pa dunay duha ka matang sa tawo. Ang mga tawong fictitious ingon man ang mga tawong tinuod.

Ang mga tawong fictitious kadtong mga tawo nga buot mopahimuot sa ubang tawo sa palibot bisan pa man kun ang ilang dughan naghuot. Naghuot tungod kay wala nila mapagawas ang ilang tinud-anay nga gibati.

Ang ilang tinud-anay nga gibati nga nagasukad sa ilang personal nga conviction ug baruganan apan nahawongan lamang sa mga tawong nagpalibot kanila o giisip nilang mga significant others sa ilang kinabuhi.

Sa laing bahin, ang mga tawong tinuod dili magsapayan kun unsay nahitabo sa ilang palibot ug unsay ikasulti sa mga tawo mahitungod nila. Buot nilang mopadayag sa ilang gibati ug baruganan kay mao man ang ilang gituohan. Bahala na kun mga tawo sa ilang palibot masakitan ug dili ganahan nila.  Sa atong pagpuyo ning kalibutan nga nagkausab usab mahinungdanon kaayo ang pagtuman sa pinitik sa atong kasingkasing kay pinaagi lamang niini mamahimo kitang tinud-anay nga gawasnon.

Dili man tuod mamahimong hapsay ang tanan kay sa matag desisyon nga himoon dunay bugti nga sakripisyo. Ug matag sakripisyo usahay moepekto sa atong relasyon sa usag usa labina gyud sa mga tawo nga giisip natong mahinungdanon kaayo nato.

Sa atong nasud daw sa dugay na kaayo ang atong pagsaulog sa gitawag natong Independence Day. Apan ang pangutana nahimo ba kitang nakabarog sa atong kaugalingon lamang o nahimo ba kaha kitang ulipon sa gihapon sa mga langyaw nga maoy nihurot sa atong bahandi ingon nga nasud.

Bisan gani ang ilang sukaranan sa kaanyag ato mang gisunod. Ang ilang pagtan-aw sa kinabuhi ato mang gihimong pilosopiya ug ang ilang pinulongan ato mang gihimong pinulongan. Ug labaw sa tanan ang ilang pagkinabuhi ato mang gihimong kinabuhi.