EDITORYAL - Way lami nga price rollback

Lihok kaayo ang presyo sa lana sa kalibotanong merkado, apan ang pagkalihokan niini mao lamang ang pagsaka ug wala kaayo dakong epekto kay ang presyo sa mga batakang palaliton padayong nisaka.

Ang lihok nga presyo sa lana nagagumikan kini sa padayong politikanhong kasungian sa mga dagkong mga nasud sama sa Amerika, Iran, Russia ug China nga dunay dakong impluwensya sa supply and demand niini ug epektibong nagkontrol sa presyo niini.

Apan bag-ohay lang dunay maayong balita bahin sa presyo sa lana, karong sunod semana gikatakdang moubos og kapin P2 ang matag litro gasolina ug sa krudo. Gikan sa P55 posibleng mahimo nalang kining P52 matag litro.

Ang hinungdan mao ang giingong naghinobra nang stocks sa lana sa kalibotanong merkado tungod sa kahinay sa demand niini karong mga panahona.

Apan maayo unta og magdugay o ba kaha masundan pa og laing price rollback aron mabatyagan sab sa mga konsumidor ang benepisyo gikan niini.

Tungod kay matag dunay price rollback pwerteng dugaya mo-adjust sa mga presyo sa gasolinahan kay kuno pa mahurot ang stocks nga ilang napalit sa mas mahal nga presyo. Apan kun gani may usbaw sa presyo sa lana, maglumba man dayon sila pagpasaka sa presyo kay bag-o na kuno ilang stocks?

Hangtud karon dili katuohan kining mga pasumangil apan wala gihapon tutoki og susi sa mga ahensya sa gobiyerno nga gitahasan sa pag-regulate niining mga gasolinahan.

Hagbay rang nagsige og ubos ang presyo sa global oil prices sukad pa niadtong bulan sa Enero, gani niabot nalang kini karon og $60 per barrel.

Sumala pa sa report sa PhilStar.com, makatulo na nag-price roll back karong tuiga nga base sa data sa Department of Energy miabot na og P5.50 matag litro sa gasolina, P4.70 sa krudo ug P3.00 sa kerosene ang gius-os.

Apan hangtud karon wala man gihapon mabatyagi sa mga konsumidor ang benepisyo niini.