Nameligro ang P257 bilyones

Ang labing uwahing mga eskandalo sa Philippine Health Insurance Corporation (PhilHealth), nga nipalili nato sa kahigayonan nga kawaton ang P257 bilyones nga gigahin sa pagpatuman sa Universal Health Care Law (UHCL), igo lang nipuno sa nagkataas nga listahan sa mga maniobra sa mga programa nga gitumong unta pagtabang sa labing nagkinahanglan apan napangitaan gyod og buslot sa mga balhibuon og kamot.

Sa samang higayon nipasidaan ni nato nga ang UHCL di garantiya nga masulbad sa usa lang ka pamilok sa kakuwangan sa sistema sa paghatod sa batakang mga pangalagad sa kahimsog ngadto sa katawhan.

* * *

Ang nitumaw nga bag-ong mga maniobra sa pagka-usik sa binilyon ka pesos nga kuwarta sa PhilHealth sa peke nga mga pasyente ug minau-mao nga mga serbisyong medikal nakapahinumdom nako sa duha ka susama nga mga insidente sa nangaging katuigan:

• Ang unang insidente naglambigit sa karaan nga Medicare sa Social Security System (SSS) nga mao na karon ang PhilHealth; ug

• Ang ikaduhang insidente naglambigit sa kontrobersiyal nga medical program ginamit ang pork barrel sa kanhi kongresista sa Dakbayan sa Sugbo nga nisangpot gyud gani og kasong pagpangawkaw sa Sandiganbayan.

* * *

Bag-o kong nasud sa usa ka kompaniya dihang gitanyagan ang karaang mga kawani sa nagpailang taga SSS nga hatagan og P3,000 matag usa kon mopirma sa iyang dala nga mga dokumento.

Nakugang ang pipila nga nibasa kay gimatuod sa mga dokumento nga duna silay TB. Apan tungod sa kuwarta wa maglangas.

Nabisto ang binuang sa paryente sa usa nila nga opisyal diay sa SSS kinsa nahibung nga managsamang mananakod ang sakit sa iyang pag-umangkon ug kaubanan sa trabaho.

* * *

Nahibung ang Commission on Audit (COA) sa kadaghan sa mga napaakan og iro sa Barangay Labangon nga nahatagan og tambal sa Tony N’ Tommy (TNT) Health Program ni kanhi Kongresista Tony Cuenco niadtong 2001.

Gawas nga gipanghimakak sa Cebu City Health Department nga nisulbong ang mga kaso sa rabies sa Labangon niadtong tuiga, nibalibad sab ang nalista nga mga pasyente nga napaakan sila og iro, niinsistir sab nga wa sila kakuha og tambal gikan sa TNT.

Gipasakaan og kasong pagpangawkaw ang wa na pakita nga mga tagduma sa TNT apan na-absuwelto si Cuenco.

* * *

[email protected]