Sugo sa lawas dili kabalibaran

Kung ang lawas na gani ang mosugo, wa gyud kay mahimo kun dili mosunod gyud kay dili kabalibaran ang kinaiyahan.

Apan unsaon naman lang kun walay dapit nga kapabuhagayan sa higayon nga gusto nang mogawas ang hugaw sa atong lawas? Magkurog, panington og bugnaw nga murag dili kaginhawa nga dili gyud masabot ang bation.

Ingon niini ang bation sa mga tinun-an sa mga eskwelahan nga naproblema sa tubig tungod kay sugod nasinati ang huwaw wala na gyud sila mahatdi og tubig.

Karon sa pag-abli sa klase kini ang major problem sa mga eskwelahan nga walay supply sa tubig.

Sa bukirang barangay sama sa Sirao Integrated School ang tubig ulan lang ang ilang gisaligan apan unsa man ang ilang mapundo nga wala man moulan.

Nindot unta ang ilang CR apan dili ipagamit kay walay tubig ikabubo, ug kon pugson sila usab ang manimaho.

Maayo nalang kay luag pa kaayo ang bakanteng kalibonan sa bukid nga nagsilbe nilang comfort field diin sila motubag sa sugo sa lawas.

Apan sa ubang eskwelahan nga puno na kaayo ang palibot, asa man modangop ang mga kaihion ug kalibangon?

Sama sa Buhisan Elementary School nga susama sa rice terraces ang location wala silay tubig bisan duol ra sila sa dam sa MCWD nga nahubsan usab.

Sa pagbukas sa klase nagdala og tubig ang mga ginikanan, ang ubang magtutudlo misugo sa ilang mga tinun-an nga magsag-ob og tubig aron dunay magamit.

Apan hangtod kanus-a man mahuman kining problemaha?

Seguro alang sa uban gamay ra ang problema apan dako kaayo kini tungod kay nakadepende sa kalimpyo ang mahimong estado sa kinabuhi ilabi na sa kahimtang sa panglawas kong dili katubag sa sugo sa lawas dako ang kahigayonan nga magdulot kini og kadaut sa lawas, ug kon ipugos nga mogamit sa cr nga dili kalimpyohan aw manimaho gyud nga peligro sa pagtakboy sa mga balatian.

Unta mahatagan kini og pagtagad kun dili man sa DepEd, basin sa local government unit. Suwayi kuno ninyo dili tubag sa sugo sa lawas di ba kaubo gyud mo!