Hinulaman ra tanan

Bag-o lang nahuman ang eleksiyon. Ang pangutana, nalipay ba ang kandidatong nakadaug, kinsa bisag dili maoy gipili sa kinabag-ang botante, mao gihapoy migulang mananaog tungod sa vote buying ug uban pang matang sa pagpanikas?

Hasta ang Kongreso nagubot ang mga midaog nga kongresista kay ubay-ubay nila ang nag-ilog kinsay mopuli sa trono ni House Speaker Gloria Macapagal Arroyo inig kapupos sa iyang termino.

Matod pa ni reelected Davao del Norte lst District Representive Pantaleon Alvares, adunay mga kauban niyang mitug-an nga may mitanyag kunog P500,000 kada boto sa matag usa ka kongresista.

Ug usab may laing kampo nga sekretong mi-offer og P1M per vote aron lang maoy modaog sa pagka speaker of the House.

Haskang daghana diay’g kuwarta atong mga kongresista, no?

Tiaw bay, humag ginastohay panahon sa ilang pagpangampanya didto sa ilang balwarte sa miaging piniliay, wala gyod sila mahutdi?

May mga minilyon ka pesos gihapon ilang kaugalingong panudlanan para vote-buying diha sa Kongreso?

Unya, maayo kaha ni? Nga klaro man ning nagkulit og dautang tilimad-on, nga tungod kay sila (hinuon dili tanan) mibuhig minilyong puhonan sa Kongreso, kinahanglang mahibalik sab nilang doble o sobra pa ang pilay kantidad nga ilang gigasto?

Luoya natong mga taxpayers, sa? Kita maoy maapektohan ug maalaot ning ilang tinonto.

Sa Senado, ang atong tigpandayg balaod, tarong ba? Base sa nangaging kasayoran, hapit tanan pong mga senador ang nahilambigit niadtong pork barrel scam nga gipanginahanan ni Janet Lim-Napoles. Gani, may mga napriso man.

Samtang ang mga idlas, nakaikyas!

Mao kini resulta sa piniliay nga pirmeng sambogan og hugawng pamaagi, diin ang mogulang mananaog dili mao ang tinuorayng gipili sa kinabag-an.

Busa, dili ta maka-expect nga limpiyo ang agi sa ilang pagpangalagad.

Kay sa piniliay pa lang, nagpakita na sa hugaw nilang bulok.

Unsaon, halos tanan, gustong mabuhong sa gahom ug bahandi, diin ang salapi sa katawhan maoy pirmeng gihilabtan.

Nalimot sila, nga bisag unsa kalapad ang kayamanan nga ilang naangkon ning kalibotan, ibilin ra gihapon ning tanan dinhi sa yuta.

Ngano? Kay gipahulaman ra ni nato sa Ginoo. Ug walay makapugong kon Iya nang bawion tanan dungan sa pagbawi sa hinulaman ra usab natong kinabui. Busa, dapat unta ampingan!