Kadudahan

Gireklamo sa konseho sa Barangay Binaliw, Cebu City atubangan sa Environmental Management Bureau-7 ang operasyon sa 10 ka ektarya nga landfill nga gipanag-iya sa ARN Central Waste Management Inc. tungod sa hulga niini ngadto sa panglawas sa publiko ug sa kalikupan.

Ang konseho sa Binaliw pinangulohan ni Daisy Ybañez miduso sa reklamo niadtong Lunes. Labing minus lima ka mga rason ang ilang gibatbat nganong midangop sila sa EMB-7. Kini naglakip sa dili na maagwanta nga kabaho nga matud pa misampot sa pagsaka sa mga nasakit sa baga sa ilang barangay.

Gawas niini, matud sa mga opisyal sa Binaliw nga ang 10 ka ektarya nga landfill usa lang unta ka material recovery facility. Ambot nganong karon lang nangusog ang mga opisyal sa Binaliw niini?  Nganong sa pagsugod sa proyekto wala sila mobabag aron di mahinayak ang operator og gasto?

Dili sayon ang kantidad nga nagasto alang sa maong facility ug dili na mabawi ang gasto kun hunongon ang operasyon. Apan kun tinuod nga way klaro nga pagtugot ang operasyon sa maong landfill, leksiyon sab ni sa mga negosyante nga  dili manglaktud sa proseso.

Kadudahan hinuon ang pagtumaw sa mga nisupak sa operasyon sa maong landfill. Dako ang posibilidad nga politika maoy nagpahipi nga motibo niini.

Dili layo ang posibilidad nga kabahin ni sa paglutos sa mga nailang supporter sa outgoing administration.

Usa sa mga timailhan mao ang mga personalidad nga nalambigit sa pagkwestiyon sa operasyon sa landfill. Ang aktibong kalambigitan ni konsehal Ramil Ayuman sa Barangay Apas sa Protect Binaliw Movement naghatag og bulok politika sa kawsa.

Si Ayuman nailang usa sa mga kritiko sa outgoing administration busa di kalikayan nga dudahang politika ang nagtukmod nila. Gawas pa unsa may interest ni Ayuman, gawas sa politika, sa mga kalihukan didto sa Binaliw?

Hinaut mahatagan og solusyon ang maong kontrobersiya nga di kinahanglan nga mosampot sa pagpatak-op sa maong pribadong labayanan og basura. Atong dawaton ang kamatuoran nga nagkinahanglan ang dakbayan og dapit nga kalabayan sa iyang basura tungod kay gisirad-an naman ang Inayawan Landfill.

Ang laing pribado nga landfill didto sa Consolacion gipasirad-an sab sa EMB-7 human sa aksidente pipila ka semana na ang milabay.

Kun atong apikihon ang Binaliw Landfill asa man ilabay sa dakbayan ang iyang basura?

Kinahanglan lang hinuon nga kumpletohon ug sundon sa management sa landfill ang tanang mga rekisitos pagsiguro nga luwas alang sa panglawas sa mga molupyo sa maong dapit ang padayon nilang operasyon.