Tinaktakay

Karong sunod buwan, daghan ang makaangkon og trabaho, apan daghan sab ang mawad-an og panginabuhian kay kadtong mga nagtrabaho isip kaswal ug job order workers sa mga siyudad ug lungsod nga bag-o na ang mga molingkod nga opisyal, pangilisan man gyud sila.

Sila mao kadtong mga kaswal ug job order workers nga nagtrabaho sa kagamhanan sa Dakbayan sa Sugbo, Mandaue, Lapu-Lapu ug ilabi na sa Kapitolyo.

Sa siyudad sa Sugbo, sigurado nga si incoming Mayor Edgardo Labella mopatrabaho gyud sa iyang mga dumadapig.

Ingon usab niini ang himoon nila ni incoming Mandaue City Mayor Jonas Cortes ug ni Incoming Lapu-Lapu City Mayor Ahong Chan.

Sa Talisay City hinoon, mora’g dili tingali kaayo manaktak si incoming Mayor Samsam Gullas kay ang mga kaswal ila man nga dumadapig ni papa niya nga si outgoing Mayor Eddie Gullas.

Pero sa Kapitolyo, paminaw ko “harus kamunggay” gyud ang mahitabo sa mga kaswal ug job order workers, kay sila mga tinudlo man ni outgoing Governor Junjun Davide, mao nga si incoming Governor Gwen Garcia, moilis gyud nila.

Mao na ang giingon sa uban nga “TamJune” na sila, o taman na lang sa June.

Pero ang nindot gyud unta nga buhaton mao ang paghatag og higayon sa maong mga kawani kun “worth” ba sila nga ipabilin sa pwesto, ug ihiklin usa ang pagpamolitika.

* * *

Gusto gyud unta ko nga inig lingkod ni incoming Mayor Edgar Labella, tutokan dayon niya ang pagsulbad sa mga nag-unang problema, ilabi na gyud kining baha ug lunop; traffic ug ang basura.

Kinahanglan nga duna siya’y itudlo nga mga kasaligan niya nga dili kay sweldo ra ang giapas, kondili, ang pagsulbad sa problema. Isugyot nako nga menosan nato ang mga parking area daplin sa mga karsada.

Pareho diha sa V. Gullas gikan sa eskina D. Jakosalem paingon sa Carbon, pastilan, double parking ang gihimo daplin sa karsada.

Tungod niini, nakapagamay kini sa agianan sa mga sakyanan ug nakamugna og problema sa traffic.

Kinahanglan usab nga tan-awon pag-usab sa administrasyon ni Labella ang pag-privatize sa pagpangolekta sa parking fees kay tungod niini ang tagdumala sa pribadong kompaniya, naghimo og dugang parking area nga walay pagtugot sa City Council.

Usa niini mao ang parkingan sa mga motor diha sa dalan P. Burgos, likud sa Basilica del Santo Niño nga kaniadto usa ra gyud unta kini ka linya, apan dihang misugod na ang private company sa pagpangolekta, naghimo sila og dugang linya sa parkingan ug nakaiban kini sa agianan sa mga sakyanan.