Nangluod sa veto

Makatarunganon gyud nga wagtangon na kining mga Barangay Mayors Office (BMO) sa kabarangayan dinhi sa Dakbayan sa Sugbo tungod kay bisan og dili pa angkunon gigamit ra gyud kini sa politika aron ipiton ang mga dili kaalyado sa mayor.

Si Cebu City mayor-elect Vice Mayor Edgardo Labella miingon nga wala masubay sa balaod ang pagtukod og susamang opisina diha sa mga barangay.

Base sa Local Government Code, ang mga barangay mao ang ‘nucleus’ sa lapad nga pangagamhanan sa gobiyerno sa Pilipinas. Mao kini ang kinauyokan sa gobiyerno ug wala nay lain pang nasuwat sa maong kodigo.

Sa ato pa, dinhi tanan magsugod ang pagdumala sa gobiyerno sa katawhan hangtud na sa taas sa ang-ang sa presidente sa nasud. Duna kini kaugalingong konseho ug dunay opisyales nga gibutang sa mga importanteng opisina aron moserbisyo sa panginahanglan sa katawhan sa barangay. Apan dihang gimugna ni Cebu City Mayor Tomas Osmeña ang BMOs, nasamok ang pagpadagan sa mga naglingkod nga mga barangay officials nga dili niya kaalyado. Daghan ang mireklamo kay ang pirma sa mga barangay kapitan dili na dawaton ug dili ilhon sa siyudad kun dili pasupotan og pirma sa BMO nga tinudlo sa mayor.

Apan dihang gikwestyon sa Konseho ang DILG bahin niini, giklaro sa maong buhatan nga dili BMO ang gimugna sa mayor kondili Barangay Disaster Control Center.

Apan kun basehan ang mga reklamo kaniadto sa mga barangay officials batok sa mga BMOs, daw gisapawan sila sa ilang trabaho kay halos tanan ang BMO naman maoy nagpadagan sa barangay samtang sila mura nalang og tawo-tawo sa humayan.

Usa pa, mura kini og duplication of functions sa mga lawfully elected officials nga giwagtangan og gahom bisan og sila maoy gihatagan sa mga konstituwente og mandato nga moserbisyo kanila.

Maayo nga wagtangon na kini ni Labella sanglit nakapabuak-buak kini sa panaghiusa sa mga molupyo sa mga barangay ug nakadugang hinuon sa kahasol sa mga konstituwenteng nanginahanglan og tabang.