EDITORYAL - Tagpila man imong boto?

Adlaw karon sa paghukom. Adlaw sa pagpangita og haom ug ligdong nga mga opisyales sa local nga pangamhanan ug ingon man sa Kongreso sa nasud nga maoy magdala sa Pilipinas sa kalamboan ug kadaogan.

Maayo lang unta og ang mga botante dili magpadala sa hulhog sa kwarta nga gipalit sa ilang botos kondili, mogamit gyud sa ilang konsensya sa ilang pagbotar para sa kaugmaon sa ilang mga anak, sa ilang lungsod ug sa nasud.

Karong adlawa mas gamhanan bisan ang mga garbage collectors o bisan kadtong mga estambay nga walay kapuslanan sa katilingban basta rehistrado silang botante ug makabotar karong adlawa.

Angay untang hinumdoman sa katawhan nga panahon gani sa eleksyon, sila maoy labaw nga makagagahom ug dili ang mga kandidato. Kay sila man maoy mobotar kanila aron sila makalingkod.

Angay mainsulto ang botante sa presyo sa boto nga gipalit kanila sa kurakot nga kandidato. Kay ang bawos sa mga kandidatong kurap makadaghan kapiloon sa presyo sa boto nga ilang napalit kun sila unya ang makalingkod.

Angay unta hunahunaon sa mga botante nga kaning mga tawhana nga ilang gibotaran molingkod og pipila ka tuig ug gipaabot nga sila motrabaho gyud sa tahas nga gisalig kanila sa katawhan.

Maayo lang unta og ang makadaog dili kurakot. Apan kay namalit kini og boto, siguradong kurakot kini ug mamawi gyud kini unya og makalingkod na sa pwesto hangtud sa pagkapupos sa ilang termino.

Busa mas maayong ampingan ug hunahunaon gyud sa mga botante kun kinsa ilang botaran bahala pa og may tawong miduol kanila ug gihatagan sila og kwarta aron botaran ang usa ka kandidato.

Ang usa ka boto nga kinasing-kasing ang pagpili sa kandidatong gibotaran tam-is kaayo og kahulogan ug kini gamhanan. Samtang kadtong mga namaligya og boto wala silay bili kay barato ra ilang dungog sama ra ka barato sa gibayad sa ilang boto. Dali ra sab silang mapapas ug makalimtan sud lang sa pipila ka oras sa mga kandidatong nakapalit kanila.