Sa makausa pa, vote wisely for your sake

At stake karong Lunes, May 13 election day, mao ikaw ug ang lungsod, dili ang mga kandidato, ug dili ang mga endorsers. So, vote wisely for your sake. Listen to your conscience. Ayaw kaayo pagsalig sa mga propaganda kay tingalig mabiktima kamo sa mga fake news.

Listen to your conscience, ug matud ni Archbishop Jose Palma, pray, kay lagi balaan ang katungod pagpili. Kun unsa ang imong ugma, mag-agad kinsa ang imong gasahan sa bililhon nimong voto. Ingon ikaw niini ka gamhanan.

Tapos ra ba sa eleksyon, mawala na gikan kanimo kining imong pagkagamhanan. Haring lungsod ikaw karong  Mayo 13. Pagkaugma dayon, hukasan ikaw sa imong pagkahari. Ug sila nang mga suloguon (unta) sa lungsod mao nay maghari.

Sama sa naandan, sila ang atong mga agalon, ug kita na usab unya ang mahimong mga ulipon. Busa, vote wisely and responsibly ... for your sake.

* * *

Gideklarar kuno ang gubat batok sa vote-buying. Mao ba? Di ba kada eleksyon man ning pagpakiggubat batok sa pagbaligya ug pagpalit sa mga botante?

Gumikan sa mga report nga nadawat sa Comelec bahin sa rampant vote-buying, ilang gi-activate ang Multi-sectoral Kontra Bigay Task Force nga maoy mo-prosecute niadtong mamaligya ug mamalit og voto. Very good.

Kun maghisgot ta’g vote-buying, natural ang mga kandidato gyuy mohimo niini. Of course, dili sila personal maoy mangunay sa pagpamalit. Mahimo nga ilang ipaagi sa ilang mga dumadapig. Ug kun madakpan, ang mga dumadapig ray ma-prosecuted.  Apan, sila gyud ang utok sa vote-buying tungod kay sila man maoy main beneficiary.

Kining vote-buying nahimo na man kining kabahin sa atong eleksyon dinhi sa atong nasud. Apan despite sa kampanya ug operation kunohay batok niini, wala may nadakpan nga kandidato nga namalit sa mga botante.

Kun pananglitan, igo lang kong gisugo pagpamalit sa mga botante, unya  sa akto masakpan ko, unsa man, ako ray ikiha? Ang nagsugo diay nako ug ang tinubdan sa kwarta walay tulobagon?

Giingon dinhi nga ”Vote-selling  is the act of a person, association, corporation, group or community, who solicits or receives, directly or indirectly, in exchange of voting for or against any candidate.”

Alang nako, unahon gyud pagbantay ang tinubdan sa vote-buying kay sa vote-selling. Kay unsa man akong ibaligya kon walay mamalitay?

Sama sa kampanya batok sa gidiling druga, tungod kay samtang ang gigukod kanunay mao man ang mga drug user ug pushers, samtang ang mga supplier o ang tinubdan ning maong mga druga, hayahay ang kabutang.

Kun walay supply sa gidiling druga,  wala nay mabaligya niini, busa, wala nay mayupyop ang mga users niini, ug wala na poy mabaligya ang mga pusher niini.

Busa, kun ang tanang kandidato dili mag- vote-buying, dili mahitabo ang vote-selling. Atong masabot nga ang tinubdan niining maong matang sa irregularity sa eleksyon, mao gayud ang mamalitay.  Unsaon sad ning atong mga pumipili nga naanad na man sa pagbaligya sa ilang katungod pagpili. Mao nga mapugos intawon ang mga kandidato pagpalit sa ilang mga voto.

Mao nga sa matag eleksyon, mo-ingon dayon kining maong matang sa mga pumipili: “Happy days are here again.” Unsaon nato pag-uswag ini uy?