EDITORYAL - Comelec control

Angay ba gyung ipaubos sa Comelec control ang Cebu City sa umaabot nga eleksyon karong adlaw nga Lunes Mayo 13?

Mao man kini ang gipangayo ni Cebu City Mayor Tomas Osmeña sa dihang sa unang higayon may nahitabo didto sa bukirang mga barangay nga diin kaalyado niini ang mga barangay kapitan nga giingong gihasi.

Sa nanglabay nga mga adlaw may mga reklamo ang kampo sa mayor nga gihasi ilang grupo sa mga polis. Gani, may kapitan nga gironda sa kapolisan tungod sa paghupot og ilegal nga armas ug kini iyaha sab nga kaalyado.

Nagduda siyang gigamit ang kapolisan sa iyang mga kaatbang aron hadlukon ang iyang mga supporters.

Ang kapolisan miklaro nga igo ra silang nagbuhat sa ilang trabaho ug wala silay gilabanang politiko. Wa pa sab hinuoy resulta sa imbestigasyon bahin niining tanan.

Ang ingon niini nga mga panghitabo estranghero kaayo sa paminaw sa mga taga Siyudad sa Sugbo tungod kay nabantog ang mga Sugboanon nga malinawon ug dili samokan panahon sa eleksyon.

Kun tan-awon ang mga panghitabo sa nanglabay nga mga adlaw, walay nigawas nga balita nga direktang kalambigitan sa grupo sa kaatbang ni Osmeña kondili ang mga polis ra gyud iyang gibalik-balik og litok.

Wala sab gani niya direktang gipanganlan ang Barug-PDP Laban ni Bise Mayor Edgardo Labella ug kanhi mayor Michael Rama atol sa pakig-atubang niya sa mga sakop sa media.

May katungod ang mayor sa paghangyo sa Comelec ilabi na kun sa iyang tan-aw nabutang sa peligro ang iyang mga sakop.

Ang Comelec en banc maoy mohukom kun sundon kini basta naay mga bayolenteng panghitabo nga posibleng makabalda sa piniliay, ang lugar napaubos na sa Comelec control kaniadto, init kaayo ang panagribal ug may presensya sa mga private armed groups ug insurhensiya.

Dili unta magpadala sa kahadlok ang mga botante, bisan kang kinsa pa sila pabor tungod kay mahinungdanon kaayo ang matag lugas sa boto para sa mga angayang pilionon.

Di sila magapil-apil pagpaypay sa kainit niini aron dili modako ug masamok na hinuon.