Hikog

Dunay usa ka tawo nga kanako nangutana kun nganong ning atong panahon karon nagkadaghan naman gyud ang buot mohunos sa ilang kinabuhi. Butang nga nakahatag kanako og kaikag nga manginlabot ning maong kahimtang ug panghitabo diin ang imo ug akong kabanay ang mahimong mobuhat sa ingon.

Atong himoon ang pagpamalandong ning maong isyu pinaagi sa pagtubag sa pangutana: “Kay unsa ba gud ang hikog? Ang English definition nagkanayon: “Any deliberate self-damaging act from which the chance of surviving is uncertain.” Kun maghisgot kita og deliberate nagpasabot kini og tinuyoan o gimbut-an.

Tuyo gyud sa hingtungdan nga tapuson na lang gyud ang kinabuhi niya nga puno na tingali sa daghang stressors ug mga problema. Si Karl Menninger nihimo og tulo ka mga hut-ong sa gitawag nato og suicidal behavior. Kini naglambigit ning mosunod:

Chronic Suicide nga naglambigit sa mga ascetical practices (sama pananglit sa puasa,pagsakripisyo nga lawasnon ug uban pa) adiksiyon sa alcohol ug sa drugas.

Focal Suicide nga naglambigit sa pagdaut sa kaugalingon sama sa pagdunggab, paghigot sa liog, paglaslas. Apil pud niini ang tinuyoang mga aksidente.

Organic  Suicide nga dunay kalambigitan sa psychosomatic nga mga balatian. Alang sa uban ang hikog sa iyang kinatibuk-ang pagsabot mao nga bisan unsa nga makadaut sa lawas ug sa kinabuhi sa tawo.

Ang ubang mga researchers nitala ning upat ka mga proseso nga mahitabo sa panahon nga ang usa tawo mohimo og paghikog. Ila kining gi grupo ning mosunod: Suicidal Acts; Suicidal Gesture; Ambivalent Suicide; Completed Suicide ; ug  Serious Suicide.

Sa panahom  ni Marvin Wolfgang kadaghanan sa mga naghunos sa ilang mga kinabuhi mao ang mga batan-on tungod sa depresyon. Labina sa mga panahon karon dili maayo nga ato lang i-take for granted ang mga hudlat sa mga tawong nipadayag  nga maghikog sanglit kun anaa kini sa ilang hunahuna mahimong anaa usab kini sa ilang pagbati ug kun mahatagan og kahigayonan, ila gyud kining himoon.

Ning panahon nato karon nahimong paspas ang teknolohiya apan nahimong hinay ang tawhanong pagpakabana sa usag usa. Mao tingali nga daghan kanato ang nahimong detached ra kaayo sa panghitabo sa atong palibot o feeling nato nahimo kitang layo sa uban mao nga nakahunahuna kita og kutlo mismo sa atong kaugalingong kinabuhi. (Sumpayan pa)