Langub in the City nga All in One

Dili na kinahanglan modayo pa sa Palawan aron masaksihan ang underground river ug sa Siquijor aron masinati ang gitawag nga healing island tungod kay anaa man diay kini dinhi sa dakbayan sa Sugbo.

Two in one ang makita sa Barangay Sudlon 1 diin nahimutang ang Satuhan Cave nga dali ra gyud kaayong maabot.

Ini’g abot sa Sitiohan sa naasoyng barangay pipila lang ka lakang maabot na ang langub.

Sa ganghaan pa lang sa langub mabatyagan na ang ka mingaw o solimne sa dapit nga dinuyogan sa huni sa mga langgam nga Goryon, Sayaw ug Kwaknit.

Dako ang langub nga susama sa simbahan ang porma sa sulod diin makita ang katahom nga kinulit sa panahon.

Adunay duha ka level ang langub diin ang unang bahin mao ang literal nga gihimong simbahan sa mga magtotoo.

Dunay mga bato nga porma og altar nga gipatongan usab nila sa mga imahen.

Makita usab ang rock formation nga murag langgam nga naghangad, naa usay murag porma og leon ug uban pa sa sulod sa langub.

Apan dili lang usa ka level ang langub kon dili anaa kini second level nga maoy tinubdan sa tubig.

Dinhi magkuha og supply sa tubig ang mga mag- uuma sa barangay Sudlon 2 tungod sa ka abunda sa tubig.

Ang tubig susama sa sapa nga nagsubay sa langub nga molagbas sa laing sitio nga moabot kuno sa tulo ka oras kon lakawon.

Wala nalang ko molahos sa kinatumyan sa langub kay hilabihan naman ka ngitngit apan mabatyagan gyud ang kabugnaw sa tubig.

Ang sapa alang sa mga tawo nga adunay pagtoong espirituwal gibansagan nilang sapa sa Hordan o Jordan River ug gituohan nga makaayo sa mga balatian.

Hinoon ang sapa nikunhod ang tubig karong panahona tungod sa El Niño busa apektado pud ang mga mag-uuma nga nagsalig sa tubig niini.

Dako kaayong potential ang naasoyng Satuhan Cave kung turismo ang hisgotan kay mahulog nga all in one, agrikultura, kalikopan, turismo ug uban pa.

Unta dili maabusohan sa mga tawo nga mobisita sa dapit.