EDITORYAL - Nagkadaghang hungog

Samtang nagkaduol na ang piniliay, nagkadaghan ug nagkagrabe na sab ang mga gipasapasang mga posts sa social media nga pagpangdaot sa mga politiko gikan sa mga iresponsableng netizens.

Sama sa nakalabay nga eleksyon niadtong tuig 2016, gigamit sa dili maayo ang social media sa mga ‘influencers’ nga binayran sa mga politiko aron dauton ang ilang mga kaatbang. Kini bisan pa nga daghang mga Facebook accounts na ang gipanangtang sa Facebook human namatud-ang gigamit kini nga political medium sa ubang mga politiko aron dauton ang mga kaatbang pinaagi sa pagsabwag og fake news.

Ang nakapait, daghang mga netizens nga nagpahulhog niini. Dunay ubang netizens nga kay lagi dili sila ganahan sa kandidatong gidaot bisan kabalo na silang walay basehan ug dili tinuod ang pasangil, sige gihapon sila og share niini ngadto sa uban. Gani pistahan pa nila kini sa mga kaubang mga supporters nga utro pung nagpakita sa ilang pagkawalay paghunahuna sa sitwasyon o wala lang gyuy pagpakabana nga i-check ang impormasyon bisan nalang para sa kaugalingong kasayoran.

Asa naman ang moralidad sa tawo karon? Daghan naman kaayong magmaya kun dunay patyon? Ikalipay naman nila ang kasakit sa uban ug kun sila nay matungnan mosinggit pagpangayo og hustisya?

Nganong bisan sayop ilaha mang pugson ilang kaugalingon nga sabton kining sakto? Tungod kay ganahan sila kun kinsa ang nagpakatap o kun ang impormasyon makapabor sa indibidwal o politikong ilang gisuportahan bisan sayop ilang isabwag sa uban ang ilang kahungog.

Panahon na gyud tingaling ang social media platforms kinahanglan nang irregulate sa gobiyerno kung dili kaya sa mga social media companies paghashas ang mga accounts.

Pagkaanugon sa modernong teknolohiya kun gamiton lamang sa pagpakatap og negatibong pagtulon-an sa katawhan. Mas magamit pa unta ilang oras sa mas produktibong buhat inay nga magpakatap og pekeng mga posts.