Uwan sa unang adlaw sa Mayo

Sa ato nang nahisgutan dinhi, sa atong panahon kanatong mga senior citizen, labi na niadtong dugaydugay nang na-senior citizen, sama kanako, mo-uwan gyud matag Mayo Uno. May 1st rain. Magpadayon na ang pag-uwan-uwan sa tibuok Mayo, hangtud na gani sa Hunyo.

Wa pa mouso niadtong panahona ang El Niño. Mohuwaw man apan, dili sama ka grabe ug  ka init sa ting-init ning inyong panahon karon. Ingon man, wala pa igdungog niadtong among panahon  kining inyong gitawag nga climate change, resulta sa inyong pag-among-among ug pagpanamastamas sa kinaiyahan.

Mao nga daku ang akong katingala nga niuwan gyud pag-Mayo uno, despite sa El Niño, bisan tuod og kadali ug pat-akpat-ak lang. At least, niuwan gyud.

Hinumdom sad ko nga sa wala pa maimbento ninyo ang climate change, ang morning sun among hangupon kay ang ultra violet rays makapahimsog man sa panglawas.   

Apan karon, ning inyong panahon, inig subang sa adlaw sayo sa buntag, mapaso ka na gumikan sa subrang kainit niini nga molungtad hangtud inig-sawop na sa adlaw.  Sa among panahon, ang kainit sa adlaw magsugod alas 10 sa buntag hangtud alas 3 sa hapon. Apan  karon, ning inyong panahon, init tibuok adlaw.

* * *

Napulo na lang ka adlaw gikan karon ... eleksyon na. Hinaut nga niining panahona, nasayud ka na kinsay inyong pilion, pinasikad sa inyong pag-discern, pagtimbang-timbang ug pagkonsulta sa inyong konsiyensiya,  ug dili basi sa mga endorsement , popularity, ug resulta sa mga survey. Sa ato nang gibalikbalik dinhi, vote wisely and intelligently.

Ug karon nga duol na gyud kaayo ang adlaw sa piliay, nahinumdom ko sa balaudnon sa Senado nga gipasaka ni Senador Loren Legarda, ang Senate Bill 1418, diin wala ako makadungog nga dunay kandidato nga nagtuki niini, o misaad nga mo-follow up niini inigkadaug na sa eleksyon.

Gani si Loren mismo wa na man maghisgot niini, lagmit nakalimot na. Labaw ug labi na sa ubang magbabalaud both sa Lower House ug sa Senado. Usahay hinuon kadaklitan kini’g hisgot ni Atty. Romulo Makalintal. Maayo na lang. Apan, unsa man ning SB 1418? 

Ania:  Senate Bill 1418 seeks to provide representation of the elderly in every Sanggunian and local special bodies in the LGUs. 

Dugay na kitang nagpunay og hisgot niini, apan, wa may taker nga mga magbabalaud. Ug mao na man hinuoy ilang gi-nurture party-list system nga karon gihimo nang tikanganan ni bisan kinsang buot masakop sa House of Representatives. 

Karon, bisa’g kinsa na lang ang nag-party-list.  Way klarong marginal sector nga gi-representahan.  Ambot nganong gipasagdan man lang ni sa ‘honorable’ natong mga sakop sa Kongreso? Tungod ba kaha kay maka-benefit sila niini in the long run, inig kapupos na sa ilang termino sa Kongreso o sa mga katungdanan nga ilang huptan sa mga LGUs?

Anyway,  akong hinumdoman nga kining balaudnon ni Loren nga dugay nang gilubong sa kalimot, dunay counterpart nga balaudnon usab sa Ubos Balay-balauranan, apan sama sa nahitabo sa Senado, wala makadani sa ubang mga magbabalaud.

Busa, kining tinguha natong mga senior citizen nga kahatagan og higayon nga makalingkod diha sa mga legislative bodies sa mga LGUs, magpabiling damgo nga walay katumanan.