EDITORYAL - Ingon ana lang?

Makadismaya ug makapabalaka kining mga pamahayag gikan sa Malacañang may kalabotan niining pasangil nga “oust-Duterte matrix” nga namasangil sa pipila ka mga tigbalita, mga pro bono lawyers nga nagplanong palagputon si Presidente Rodrigo Duterte.

Dihang gipagawas kining maong balita sa Manila Times daw kumpiyansa kayo ang tigpamaba sa Malacañang nga si Salvador Panelo. Apan dihang gisukit-sukit kung asa gikan ang report o intel report bahin sa maong ouster plot, iyang gitudlo si Duterte nga diha gikan ang maong impormasyon ug mao ra.

Ang mga gipasanginlan mao ang National Union of Peoples’ Lawyers, VERA Files, Philippine Center for Investigative Journalism ug ang Rappler. Ang tanan nihimakak sa pasangil ug nisaway niini kay kini nagbutang sa kinabuhi sa mga hingtungdan sa peligro base lamang sa mga pasangil nga way basehan.

Kung mahinumdoman, ang mga gipasanginlang media outlets mao ang nagpahigayon og mga subsob ug makuting investigative reports bahin sa mga bahandi sa mga Duterte nga sukad sa iyang paglingkod wala gyud nila hatagi og eksplinasyon ang publiko.

Mismo ang Department of National Defense ug ang Department of Justice mipagawas og pamahayag nga wala silay namatikdan o na-monitor nga dunay nagplanong palagputon si Duterte.

Ang mismong editor-in chief sa Manila Times nga gikatahong supak sa pagmantala niini kay way igong basehan, mi-resign pagkasunod adlaw human nigawas ang balita nga maoy mando sa tag-iya nga giingong kaalyado ni Duterte. Way laing media outlets sa nasud ang nipagawas sa maong report.

Karong bag-o, si Panelo miingon nga dili sila kinahanglan pang mopakita og ebidensya nga tinuod ang ouster plot kay matud niya dili gihapon madawat sa korte kung plano-plano o ideya lamang.

Lisud kayo dawaton sa publiko ang ingon ani nga eksplinasyon o rason. Way hustisya para sa mga supporters ni Duterte ug labaw sa tanan sa mga tawong gipasanginlan nga karon nabutang na sa peligro ang mga kinabuhi.