EDITORYAL - Ugat maoy ibton

Migawas sa balita nga gipatay sa wala mailhing mamumuno ang self-confessed druglord nga si Franz Sabalones didto sa Quezon City.

Bisan pa man sa report sa polis nga ang maong gipatay nagdala og nagkalainlaing mga identification cards nga lahi og pangalan, gituohang si Sabalones kadto tungod sa iyang litrato ug ingon man sa kompirmasyon sa nagpailang iyahang paryente didto.

Ang kadagkoan sa kapolisan dinhi sa rehiyon miingon nga bisan pa man sa maong balita, wala sila magdahom nga hingpit nga mapuo o mohunong ang operasyon sa ilegal nga drugas sa iyang grupo.

Giangkon na nilang daan nga gamay ra ang impact niini sa kinatibuk-ang operasyon sa ilegal drug trade.

Sama sa ubang mga grupo kansang mga lider napatay na, dali ra kaayo silang nakailis og tawong mohulip aron maoy mangulo sa ilang operasyon.

Gani, imbes nga momenor tungod sa kamatayon sa mga notadong drug personalities ug mga gipasanginlang ilang mga drug protector, mas dinagko pa man hinuon ang mga transaksyon kay kinilo naman ang shabu nga masakmit sa mga operasyon sa otoridad.

Gawas pa, mas daghan na hinuong mga “new players” ang nangadakpan ug dinagko ang gibaligyang ilegal nga drugas imbes nga motagam ug molikay ang mga tawo pagkalambigit sa mga ingon niini nga ilegal nga negosyo.

Ang tentasyon sa dakong kwarta maoy nakakabig aron mahaylo bisan kadtong mga yano ug hilumon nga tawo pagsulod niini nga negosyo kay dali ra kaayong makakwarta, bahala pa og ilang ikamatay.

Ang kapolisan nasayod na niini, ug ang katilingban kinahanglang mangusog pa gyud  pagsuporta ug mokooperar sa mga otoridad aron mapakgang kini tungod ug alang sa kaugmaon sa kabataan.

Kaning problema sa ilegal nga drugas bisan lugwayan pa ang termino ni Duterte, dili na gyud mawagtang pa.

Hangtud nga dili maibot ang ugat niini nga mao ang kapobrehon ug kahakog sa tawo, magpabilin kini sa umaabot pang mga henerasyon.