Uso ang paglibug-libog
Kon gisayonan lang ang Philippine National Police (PNP), National Bureau of Investigation (NBI) ug Public Attorney’s Office (PAO) sa mga implikasyon sa managlahi nga resulta sa buwag nilang mga imbestigasyon sa bangis nga pagpatay sa 16 anyos nga dalagita sa Lapu-Lapu City, napahinumdoman sila sa lapad nga kalibog nga ilang namugna sa pagdumili sa inahan sa biktima pagdason sa bag-ong kasong pagpatay nga ipasaka sa kapolisan batok sa ikaduhang suspitsado kon:
Di i-apil ang unang suspitsado nga nadakpan sa NBI; ug
Di i-apil sa ebidensiya sa lugos nga nahipos sa PAO.
* * *
Way makabasol sa tagtungod sa dalagita. Pulos mga buhatan sa gobyerno ang nag-imbestigar sa kamatayon sa iyang anak, busa:
Samtang di siya makalalis sa ilang panagsungi (ang NBI nitumbok sa 17 anyos, ang PNP nipakumpisal sa 43 anyos ug ang PAO nisukwahi sa NBI ug PNP nga wa lugosa ang biktima); apan
Di sab sila makabuot unsay iyang tuohan (tuo siya sa NBI nga apil ang 17 anyos, tuo sa PNP nga ikaduhang suspitsado ang 43 anyos ug tuo sab sa PAO nga gilugos og kadaghan ang biktima).
* * *
Di ni unang higayon nga ang lalis sa mga buhatan sa gobyerno wa katabang sa mga hingtungdan. Mas lapad ang kayagaw nga nitumaw tungod sa managlahing mga imbestigasyon sa Dengvaxia, ang bakuna batok sa dengue:
Gibasol sa PAO ang Dengvaxia sa kamatayon sa 39 ka bata nga naapil sa lapad nga pagpamakuna niadtong 2016 ug 2017; apan
Ang Department of Health (DOH) nipasabot nga way ebidensiyang maglambigit sa Dengvaxia kay ang mga biktima nangamatay sa laing mga hinungdan.
* * *
Ang lalis wa mopasaylo sa kampanya batok sa ilegal nga drugas:
Ang Philippine Drug Enforcement Agency (PDEA) niingon nga may P11 bilyones nga shabu ang magnetic lifters nga nasakmit sa Cavite sa 2018 apan si Presidente Rodrigo Duterte niingon nga way sukaranan ang pasangil;
Ang PDEA nangangkon nga nimenos ang ilegal nga drugas apan ang presidente niingon nga mas nidaghan; ug
Ang presidente mismo nilalis sa iyang kaugalingon—nipasalig niadtong 2016 nga masulbad ang drugas sud lang sa tulo ka buwan apan karong tuiga nikumpisal nga mas nigrabe ang problema kay nakasud nang Sinaloa cartel sa Mexico.
* * *
- Latest
