EDITORYAL - Mabuhi na sa P10 mil?

Mitiyabaw karon ang nagkalain-laing mga pundok sa mga kabus ug mga mamumuo batok sa gipagawas nga resulta sa gihimong “pagtuon” sa Philippine Statistics Authority (PSA) nga nag-ingong kun ang usa ka pamilya nga dunay lima ka miyembro makasugakod kun mokita og P10 mil matag buwan.

Ang gipasabot niini nga kun dunay P10 mil, dili na gutomon ang maong pamilya sa usa ka buwan, mao ba? 

Murag dili man tingali madawat sa publiko kini nga pamahayag kay dili man sa numero lamang nga P10 mil matubag ang tanang panginahanglan sa matag pamilya.

 Hagbay rang nagsige og tiyabaw ang katawhan bahin niini padayong pagsaka sa mga presyo sa palaliton luyo niining gipatumang TRAIN Law ug mga kalihokan sa presyo sa lana sa kalibotanong merkado.

Kini maoy rason kun nganong nisaka ang presyo ug walay dakong natabang ang gobiyerno pagpamenus sa epekto niini ngadto sa katawhan ilabi na sa labing kabus nga mga pamilya bisan pa man sa mga programang Pantawid Pamila ug uban pa.

Wala tingali apila pagtuon sa PSA ang mga pamilyang nag-abang lamang og kapuy-an, ug kadtong daghan ang miyembro sa pamilya apan usa ra ang nagtrabaho. 

Dunay gibayrang matrikula sa mga estudyante ug uban pa nilang panginahanglan matag adlaw sa ilang pagtuon.

Wala sab tingali nila tan-awa nga dili gani tanang nanarbaho karon ang nagdawat og hustong suholan pinasubay sa minimum wage order sa gobiyerno.

Duna pay ubang pamilya nga dunay mga masakiton nga nagkinahanglan og inadlaw-adlaw nga medisina nga kinahanglang paliton.

Karon tungod sa gipagawas nga pamahayag sa PSA mangahulogan bang dili na kinahanglang mangayo pa og umento sa suholan ang mga mamumuo?

May punto gyud ang Trade Union Congress of the Philippines (TUCP) sa pagingon nga nabalaka silang tungod sa pamahayag sa PSA, maimpluwensyahan unya panahon sa wage hike hearings ang pagpangayo og usbaw sa suholan sa mga mamumuo.