Kayano sa pagkaon
Dihang si Presidente Rodrigo Duterte nisalikway sa baby back ribs ug nangayo ug niinsistir sa pagsud-an og sardinas sa tigom sa gabinete niadtong Lunes sa gabii, nasina ko niya.
Ug nakaseguro nga wa ko mag-inusara sa pagpangindahay nga mahatagan sab og kagawasan sa pagpili unsay kan-on.
Way nahimo ang mga sakop sa gabinete. Bisan ang mga naglingkod duol niya nga nakasingo sa kalangsi sa sardinas, napugos pagpahiyom og hilaw ug bakikawng nikutsilyo ug nitinidor sa nagduga ug nagsinaw nga gusok sa baboy (bisan mas lami untang kinamuton ug pang-iton).
* * *
Mao sab kagawasnon si kanhi Presidente Noynoy Aquino sa pagpili og usa lang ka sud-an sa pribadong pakigsawo sa suod niyang mga higala gawas sa Malakanyang.
Mahimong managsama kayano ang mga pagkaon nilang Duterte ug Aquino. Apan mahimo sab nga managsama kagahi ang ilang mga ulo.
Apan kitang kasarangan nga mga molupyo di sama kagamhanan sa pagtuman sa atong gusto. Di tang kapaluto og tinuyo nga pagkaon.
Busa mapugos gyud sa pagkaon unsay ganahan sa kadaghanan o unsay gihukad na sa sud ug sa gawas sa atong mga pinuy-anan.
* * *
Kausa namalit ko og daghang sardinas, tagsa ka lata sa matag brand.
Akong gitago pag-abot sa bay ug gihinay-hinay og suwa sa kan-on sa mga higayon nga di mi magkasawo sa akong asawa.
Tungod sa kadaghan, nalilian gyud sa akong asawa ang mga wa pa mahurot.
Ang mga sungog ug bugalbugal nga nadawat nakapasubo nako nganong wa mahisguti sa batakang balaod ang tawhanong katungod sa pagpili og pagkaon.
* * *
Ambot kun ang kayano sa mga sud-an ni Aquino may kalambigitan ba sa iyang kalamposan sa pagpalambo sa nasudnong ekonomiya ug pagpapriso sa mga kawatan sa gisundang pamunoan ug kapakyasan sa pagbadlong sa ilegal nga drugas ug sa nag-abuso niyang mga tinudlo.
Sa pikas nga bahin, naklaro na nga ang kayano sa mga sud-an ni Duterte wa kapugong sa paghimong junket sa iyang mga biyahe sa ubang kanasuran, sa pagtudlo sa mga kawatan sa mahinungdanong mga katungdanan sa kagamhanan ug sa pagtila sa lapalapa sa China bisan sa pagpanghasi sa atong mga sundawo ug mga mangingisda ug pag-ilog sa kabahin sa atong nasudnong teritoryo.
* * *
- Latest
