Pantasya

Stressful kaayo ang kinabuhi mao nga daghan sa mga tawo ang buot moeskapo niini. Ang uban mohimo og daydreaming.

Adunay nindot nga epekto ang daydreaming. Apan sa laing bahin dunay bati niini. Ang nindot mao nga ang daydreaming makatabang nimo sa paghimo og scenario aron makat-onan mo nga imong himoong ritwal ang matag paningkamot aron makab-ot mo ang imong pangandoy.

Sama pananglit sa imong tinguha nga mamahimong architect, imong gambalayon sa imong imagination ang scenario nga ikaw midesinyo og mga balay.

Mahimo kining mahitabo tungod kay diha sa maong imagination gihimo nimo ang maong scenario ingon nga motivation bahala na og dili dayon nimo kini makuha. Apan ang daydreaming nga hawa sa reyalismong sanglitanan mura og lisud kaayo nga mahitabo. Sa ato pa nahimong kawang lamang ang maong pag usik sa panahon.

Kun maghisgot kita og stress reliever, mahimong stress reliever usab ang pag daydream. Paagi kini sa paglikay sa mga pressures sa kinabuhi labina kun maghisgot kita og daghang mga problema gumikan sa trabaho o dili ba kaha diha sa atong mga kaubanan nga mohimo sa ilang pag-bully kanato. Sa therapy, ang pantasya gamiton ilabina sa pag-relive sa mga kasinatian nga maoy nakaingon sa gihambing kakuwangan o kalisdanan diha sa kalambigitan.

Ang reyalidad sa kasinatiang traumatic mamahimong mahatagan og kasulbaran kun ato kining i-confront bisan pa man kun sakit diha sa atong handurawan.

Ang makanunayong pagsemento niini sa atong hunahuna maoy makapahimo niini nga matig-a sulod nato ug kun kini motig-a na malisud alang nato ang pagsagubang niini kun ugaling kini mobalikbalik diha sa mga kasinatian nato matag adlaw.

Ang maayong himuon natong unod sa daydreaming mao ang mga nindot ug dili ang mga bati kay diha sa paghunahuna sa mga nindot ug maayo makahimo kita og mga nindot usab ug maayo.

Kay ang paghunahuna og bati maoy makapahimo sa imong kinabuhi nga negatibo. Busa himoa kining mosunod ingon nga imong balansayon adlaw adlaw.

1. Piyonga ang imong mga mata.

2. Ginhawa og lawom.

3. Paghunahuna og maayo nga mga butang ayaw ang mga dautan

4. Hupti ang positibong baruganan nga ang imong gidamgo ang mahatagan gyud og katumanan puhon.

5. Salig nga mahitabo kini kay walay dili mahimo sa tawo nga may pagtuo.

6. Ug kun moabot na ang punto nga makab-ot mo na ang imong damgo tabangi ang uban aron makab-ot pud nila ang ilang mga damgo sa kinabuhi.

7. Ayaw kabalaka sa mga pagsulay kay normal ra silang mga hitabo sa kinabuhi. Kun gisulay ka nagpasabot nga ikaw buhi ug may panghunahuna.