Sa kampanya pa lang nanikas na

Misikad na ang kampanya sa mga lokal nga kandidato niadtong Marso 29 diin nagsugod na usab ang sinikaray sa mga magkaatbang nga partido.

Gani sa national candidates hagbay ra nga nagbinaslanay og mga mahait nga alegasyon ang masigka partido.

Duha ka partido ang init kaayo sa ilang mga binabaay nga paghingalan sama sa “Otso Deretso sa Inidoro”, samtang duna usay mobalos nga sa pag ingon nga “Hugbong ng Pag Babaho.”

Walay mapili nila nga parehong adunay common denominator nga ang “baho” o gikan sa hugaw nga maoy nagrepresentar sa ilang pagkatawo.

Hinaot unta nga kutob lang kini sa baba ang ilang sinungogay kay mo reflect man gud dili lang sa ilang kandidatora kun dili sa ilang pagkatawo.

Dili man siguro gyud gikan sa baba sa mga politiko ang paghingalan og bati kay kasagaran gikan sa ilang mga supporters apan dili lang usab nila sakyan ang mga tawo aron medyo mo level up na usab ang kampanya nga dili kutob da binastos o murag binata.

Ibase sa plataporma ang ilang mga iyagyag ngadto sa mga botante kinsa mao nay motimbangtimbang kung haum ba sila pilion aron ibutang sa pwesto.

Samtang bisan pa man sa hugot nga pahimangno sa Commission on Elections Comelec kabahin sa insaktong pagpamutang sa mga campaign posters ug sa insaktong gidak-on daghan gihapon kaayong mga gahi og ulo.

Aduna na untay designated campaign poster area apan naa gihapoy namilit sa bisan asa basta makabalandra lang ang ilang mga bagag nawong, naay gipamutang sa mga poste sa kuryete ug sa punoan sa kahoy ug bisan asang dapita.

Ang ingon niining mga kandidato klaro kaayong mga tikasan kay sa sinugdanan pa lang namintaha naman.

Murag wala man seguroy mapili ani nila kinsa himoon ang tanan makadaug lang pastilan.

Bisan og dako kining kalapasan sa lagda sa election apan dedma sila kay nasayod sila nga huyang ang implementaryon niini sa Comelec.

Ambot lang kun naa na bay nasilotan nga nagpataka og pilit sa ilang mga posters murag wala man siguro.

Sa pagsugod pa lang sa proseso sa ilang pagpapili hugaw nang daan samot na sa eleksyon og mas labaw pa inig lingkod na nila sa katungdanan.

Karon pa lang mialingasaw na ang mga baho sa mga kandidato nga nagpakita na sa ka hugaw nilang moduwa sa politika.

Atangan nalang nato kun panangtangon ba gyud sa mga kandidato ang ilang nagkatag nga mga campaign posters o ba kaha himoon na usab nilang sulogoon ang Comelec nga maoy mobaklas sa ilang mga propaganda materials.