Kumbati na gyud

Init na gyud kaayo ang politika. Sa dakbayan sa Sugbo, ang kalma nga si Vice Mayor Edgar Labella mora’g nagpangusmo na sa kalagot kang Mayor Tomas Osmeña nga iyang kaatbang nga kandidato pagka mayor.

May mga post gud sa social media nga si Labella mo-address na lang sa mayor og “Mr. Osmeña” ug gihinganlan niya kini og “king of liars.” Nasuko si Labella sa giingon ni Osmeña nga siya mibabag sa P18 Billion nga proyekto sa Kawit Island.

Karong nagsugod na ang kampanya, makapaabot kita og mas init pa nga tinubagay nila ni Labella ug Osmeña.

* * *

Unya, si Mabolo Barangay Captain Niña Mabatid nga midagan pagka konsehal sa Barug PDP mora’g nasuyaan usab sa iyang kaubang kandidato tungod sa  pagpasiugda og buwag nga kalihokan sa pagpangampanya.

Pastilan, nganong masuya man tawon mo sa inyong kauban nga igo lang nga naningkamot aron nga makakumbinser og mga botante? Paghimo lang sab mo og inyong mga programa.

Kini gud si Niña naa may iyang “Magstorya Ta” nga moadto siya sa barangay nga siya ra, ug personal nga makig-estorya sa katawhan. Usahay mokuot sa iyang bulsa aron pagtabang sa katawhan. Aw, nasuyaan sa iyang kaubang kandidato.

* * *

Sa probinsya, si Kongresista Gwen Garcia mipasaka og kaso batok nila ni Gobernador Jun Davide ug Vice Governor Agnes Magpale tungod sa planong pagtukod og 20 ka andana nga commercial building tupad sa Kapitolyo. Pero tan-aw nako, ang pagpasaka og kaso ni Gwen nila ni Davide ug Magpale, dili makabuling sa ilang kadungganan kay wala man kini maglambigit og pagpangawkaw, sama kang Gwen nga nag-atubang og kaso sa Sandiganbayan.

Kining gihimo ni Gwen nga pagsang-at og kaso batok nila ni Davide ug Magpale, gitumong ra man aron nga pugngan ang planong pagtukod og building tupad sa Kapitolyo.

Kon ayuhon pagpasabot ni Magpale ang katawhan kon nganong gikiha si Gwen tungod sa pagpalit og yuta nga anaa sa ilawom sa dagat, ako nagtuo nga makapanglingolingo ang katawhan.

* * *

Sa Mandaue, misugod na usab pagsuroy si Mayor Luigi Quisumbing sa 27 ka barangay sa siyudad. Apan mora’g daghang katawhan sa Mandaue ang nakalitan kay karon na lang kuno kini himoa ni Luigi nga nagkaduol na ang eleksiyon.

Mao kini ang sayop ni Luigi nga dili kaayo makighugoyhugoy sa katawhan kon wala pa ang eleksiyon. Matud sa akong amigo nga reporter sa Mandaue nga ang kontra ni Luigi nga si Kongresista Jonas Cortes kanunay gyud nga mobisita sa kabarangayan bisan walay eleksiyon.

Tungod niini, makaingon ko nga makabentaha gyud si Jonas Cortes kay mas higala man niya ang katawhan. Mahimo tingali nga kon naa si Luigi, magngisi ang mga tawo, apan inigtalikud, moyamiid.