Unsaon pagpatuman ang sugo
Kon tuohan ang pakigpulong ni Presidente Rodrigo Duterte sa Koronadal City sa South Cotabato niadtong Martes sa gabii, nagkasulti sila ni Lapu-Lapu City Prosecutor Ruso Zaragosa pinaagi sa telepono. Masuk-anon nga nipahibawo ang presidente nga iyang gisugo si Zaragosa sa pagpadakop pagbalik sa ilang gipalingkawas nga 17-anyos nga suspetsado sa bangis nga pagpatay sa dalagita sa Opon.
Kusganon nga gikuwestiyon sa presidente ang baruganan nilang Zaragosa ug ubang prosecutors nga napakyas ang National Bureau of Investigation (NBI) sa pagtuman sa mga panginahanglan sa hot pursuit arrest sa suspitsado.
* * *
Gihulagway sa presidente nga karaan na ang mga probisyon sa hot pursuit (o paggukod sa suspetsado pagkahuman gyod sa krimen) sa Revised Penal Code nga unang naumol niadtong 1930 ug busa di na mohaom sa bag-ong panahon. Ambot kinsay nagpahibawo sa presidente apan nag-ambihas ang iyang kasayoran ug sa gihimo sa prosecutors sa Opon:
Gipakaingon sa presidente nga gibuhian ang suspetsado kay nadakpan unom na ka adlaw human sa krimen; apan
Ang gitumbok sa prosecutors mao ang ka-way direkta nga kasayuran sa NBI nga ang suspitsado maoy naghimo sa krimen.
* * *
Akong nahibaw-an nga ang suspetsado naa pa sa safehouse nga gipili sa iyang pamilya ug wa pa mahibalik sa kustodiya sa social workers sa Opon. Wa mi magkasulti si Zaragosa apan gipahibawo ko sa iyang buhatan nga wa siyay kamandoan sa pagpadakop pagbalik sa suspitsado.
Gani, way motion for reconsideration nga gipasaka sa NBI hangtod sa pagtak-op sa mga buhatan gahapon sa hapon, sukwahi sa ilang pahibawo niadtong Lunes.
* * *
Bisan ang kapolisan wa kahibalo unsaon pagpatuman ang sugo ni Presidente Duterte sa pagtanggong pagbalik sa suspitsado. Matod ni Police Colonel Bernard Banac, tigpamaba sa Philippine National Police (PNP), magpaabot sila sa kamandoan sa korte.
Nga dili mahitabo kay wa pa man mapasaka ang kaso sa korte. Ambot may mangahas ba sab sa pagpahinumdom sa presidente nga di siya makabuot-buot sa pag-usab sa mga lagda sa hot pursuit arrests. Bisan pa kon nahimo siyang luyuluyo nga piskal sa Davao City sud sa siyam ka tuig gikan sa 1977 hangtod sa 1986 ug bisan pa kon siya na ang labing taas nga opisyal sa nasud karon.
* * *
- Latest
