EDITORYAL - Bahad nga way padulngan

Mihulga si Moro National Liberation Front chairman Nur Misuari nga dunay mahitabong giyera kun dili mahinayon ang pag-ilis sa sistema sa gobiyerno ngadto sa pederalismo.

Ang karaang rebeldeng lider nakigkita kang Duterte sa Malacañang pinaagi sa imbitasyon sa pangulo ug didto ilang nahisgotan ang kabahin sa pederalismo ug didto nibahad kini nga andam kining makiggubat pagbalik.

Si Misuari maoy nagtukod sa MNLF nga unang gikasabot sa gobiyerno pinaagi sa Tripoli Agreement hinungdan sa pagkatukod sa gibungkag nga Autonomous Region in Muslim Mindanao (ARMM).

Way kwestyon kun tinud-on ni Misuari ang iyang bahad o dili tungod kay di ikalimod aduna pa man siyay  loyal nga mga sakop ilabi kadtong gikan mismo sa iyang probinsya sa Jolo, Sulu. Apan dili na kini sama kaniadto ka solido ang MNLF gumikan kay daghan na sa ilang mga miyembro ilabi na kadtong naa sa mainland Mindanao nga gustong hatagan og tsansa ang Bangsamoro Organic Law.

Ang BOL maoy nagsilbing balaod –basehan sa gitukod nga Bangsamoro Autonomous Region in Muslim Mindanao (BARMM) puli sa ARMM.

Sa BOL, ang BARMM gihatagan na og mas lapad nga otonomiya ug gahom pagpadagan sa ilang teritoryo nga wala kaniadto sa ARMM.

Kun pananglitan mahitabo gyung makiggubat pag-usab si Misuari sa gobiyerno, walay lider sa Pilipinas nga dili andam moatubang kaniya. Mao sab kini ang sumbalik –bahad ni Duterte kaniya.

Apan nangahulogan kini nga daghan na usab mga Pilipino ang mangamatay nga unta malikayan pinaagi sa diplomasya.

Napamatud-an naman wa pay rebeldeng pundok ang nakadaog batok sa gobiyerno  sa Pilipinas gumikan sa kakulang og suporta gikan sa katawhan.

Kay kun nakauyon mga tawo sa panggobiyerno way rason aron sila modapig  sa mga rebelde.

Unsa may naa kang Misuari aron makakombinsir ang tibuok Mindanao, Visayas ug Luzon aron mag-alsa batok sa gobiyerno ang mga tawo. Wa nay pulos ang armadong gubat kondili diplomasya ug panagsabtanay sa parehong mga Muslim ug Kristiyanong Pilipino.