Sulbad sa kanihit sa tubig
Daghan kong higala nga kun imong sultihan og bisan unsang problema modayon og ingon nga, “Naa koy ideya unsaon pagsulbad ana!”
Apan si Antonio Tompar, Chairman sa Mactan Rock Industries Inc., ang una nakong gikasulti nga sa mga problema nga akong gihisgutan nidayon og tubag nga, “Nasulbad na nako!”
Ug sa di pa ka makahunahuna nga nagpagarpar lang, nidason siya sa pag-detalye giunsa niya pagsulbad ang problema ug diing dapita sa Sugbo, o sa Kabisay-an, o sa Mindanao, o sa Luzon nga napatuman niya ang tukmang proyekto pagsulbad sa problema.
* * *
Dihang nipahibawo si Chairman Joel Mari Yu sa Metro Cebu Water District (MCWD) nga ipatuman nilang desalination (paghimong tab-ang ug mainom sa tubig gikan sa dagat) pagsulbad sa kanihit sa tubig, nanghinaot siya nga madawat sa mga Sugbuanon ang mas taas nga bayranan.
Mas detalyado ang pasalig ni Tompar: Ang desalinated water nga tag-P60 matag cubic meter mas barato gihapon kay sa gipamalit sa Sugbuanong mga konsumidor gikan sa uban nga pribado nga mga kompaniya kay ang usa ka cubic meter nga tubig makapuno og hangtod 50 ka balde.
* * *
Dihang gisukna sa Arangkada sa DYAB Abante Pa, Bisaya! kun uwahi na bang pag-usab sa sistema nga usa ra ka tubo ang agian sa tubig mainom ug panghugas, nipahibawo si Tompar nga napahimutang na nila sa South Road Properties (SRP) tungod sa awhag ni Cebu City Mayor Tommy Osmeña ang sistema nga may tulo ka tubo:
• Ang una para sa tubig nga mainom;
• Ang ikaduha para sa tubig nga panghugas; ug
• Ang ikatulo para sa tubig nga i-recycle.
* * *
Gihangop ni Tompar ang sugo ni Environment Secretary Roy Cimatu paglimpiyo sa mga sapa, nga gipatuman na sa Metro Cebu, kay magamit ang iyang teknolohiya paglimpiyo sa tubig gikan sa mga suba, apil nang sa Guadalupe, Mahiga ug Butuanon. Napatuman na ni niya niadto sa Pardo ug Banilad sa wa pa mahugaw pag-ayo ang mga sapa.
Gitanyag niyang teknolohiya aron magamit dayon ang Pasig River sa pagtabang pagsulbad sa krisis sa tubig sa Metro Manila.
Nipasalig siya nga ang abunda ug baratong tubig mainom gikan sa mga sapa makapa-pahuway sa hapit na mahubsi nga mga tinubdan sa groundwater.
* * *
- Latest
