EDITORYAL - Hain man si Peter Lim?
Walo ka buwan na ang nakalabay sukad nga nalutsan og warrant of arrest ang Sugboanong negosyante nga gipasanginlan ni Pres. Duterte nga druglord nga si Peter Lim, apan hangtud karon wala pa gihapon kini nadakpan sa mga otoridad.
Si Duterte makadaghang higayon nga nanganti nga panghutdon ang mga nalambigit sa ilegal nga drugas dinhi sa nasud tungod kay dili siya motugot nga maguba ang kaugmaon sa mga mosunod nga henerasyon tungod sa pakyas nga pamunoan.
Si Lim gipasakaan og kaso Department of Justice base sa mga pamahayag sa laing druglord nga si Kerwin Espinosa kinsa nibutyag sa Senate inquiry nga si Lim ang tigsuplay kaniya og ilegal nga drugas.
Si Espinosa kinsa nadakpan na karon sa otoridad kauban ni Lim sa maong kaso uban usab nilang Marcelo Adorco, Ruel Malindangan ug uban pa.
Niadtong Agusto sa miaging tuig, nalutsan og warrant of arrest si Lim gikan sa Makati Regional Trial court gikan sa sala ni Judge Gina Bibat - Palamos sa Branch 65 tungod sa illegal drug trade.
Ang negosyanteng Lim pinaagi sa iyang abogado kusganong nihimakak sa mga akusasyon batok kaniya. Sukad niadto, wala na kini nipakita sa publiko.
Si Chief Supt. Debold Sinas mibutyag nga nagpadayon ang manhunt operation batok sa maong negosyante. Apan wala siya mohatag pa og dugang mga impormasyon bahin sa ilang pagpangita.
Si Lim dili sayon pangitaon ilabi na nga gidungog kining daghang gipanag-iya nga mga balay sa nagkalain-laing bahin sa nasud ug sa abroad.
Labaw ng dili sab kini magpasayasaya karon tungod daghan ng gipasanginlang nalambigit sa ilegal nga drugas ang gipamatay.
Ug dako kini hagit para sa law enforcement agencies ang madakpan si Lim kung dili nila gustong madaot si Duterte ug sila mismo gikan sa mga mata sa publiko.
Ilabi na nga gisaway na sa mga kritiko sa presidente ang war on drugs kay pulos lang “gagmay nga isda” ang nangadakpan.
Arangkada
Ni Leo Lastimosa
Nakalangay sa Mananga dam
Andam na ang Metro Cebu Water District (MCWD) sa pagtukod sa Mananga dam nga gipasalig nga makatabang sa pagsulbad sa kanihit sa tubig sa Metro Cebu. Gipasalig ni MCWD Chairman Joel Mari Yu ang dam makatigom og hangtod sa 100,000 cubic meters matag adlaw gikan sa suba sa Mananga.
Matod ni Yu andam na ang kuwarta ug nagpaabot na ang pribadong mga kompaniya nga interesado nga mopatuman sa proyekto.
Apan nikumpisal si Yu nga di silang kalihok hangtod nga makalingkod ang mga modaog sa piniliay karong Mayo 13.
* * *
Nagkinahanglan og pagdason sa lokal ug nasudnong politikanhong liderato ang dam, nga nagkinahanglan og dul-an sa dekada sa pagtukod, tungod sa duha ka labing dagko nga komplikasyon:
Mahimo nga madoble ang bayranan sa mga konsumidor sa tubig sa Metro Cebu gikan sa P29 matag cubic meter (kinabaratohan sa tibuok nasud) karon ngadto na sa P60 matag cubic meter (susama sa presyo sa Metro Manila); ug
Kinahanglan nga ibalhin ang hangtod 1,000 ka pamilya sa tulo ka barangay duol sa suba sa Mananga nga maapektahan sa pagtukod sa higante nga proyekto.
* * *
Nitug-an si Yu sa Arangkada sa DYAB Abante Pa, Bisaya! nga human makalingkod ang mga mananaog sa piniliay sugod sa udtong tutok karong Hunyo 30, ila dayong duawon ang mapili nga gobernador sa Sugbo, mayor sa Cebu City ug mayor sa Talisay City.
Sila maoy kinahanglan nga kumbinsihon sa MCWD sa kadinalian ug kamakiangayon sa pagtukod sa dam nga may gitas-on nga 100 ka metro sa luna duol sa utlanan sa Talisay City ug Cebu City.
* * *
Labing lig-on nga mga argumento nga giandam sa MCWD alang sa proyekto:
Hapit na matilok ang groundwater (nag-rasyon na ganing MCWD tungod sa El Nino) ug busa kuwang na alang sa nagtubo nga populasyon sa Metro Cebu;
Ang suba sa Mananga maoy kinadul-an nga tinubdan sa surface water kon itandi sa mas layo nga suba sa Lusaran sa bukirang bahin sa Cebu City ug sa busay sa Kawasan sa habagatang lungsod sa Badian; ug
Mas mahal ang tubig nga gipamalit karon sa mga konsumidor gikan sa water refilling stations ug uban nga pribadong mga kompaniya sa tubig.
* * *
- Latest
