Abo sa kaluwasan

Gikan ta sa punoan nga makasasala. Busa, kitang tanan nga maoy bunga sa ilang pagpakasala, nilang Eba ug Adan, gihimugso ning kalibotan nga makasasala usab – nianang matang sa sala nga gitawag og panulondon.

Sanglit kon unsa ang punoan, mao usab ang bunga.

Mao nga importante sa ginikanan ang pag-agak og tarong sa mga anak subay sa kabubut-on sa Diyos. Apan unsaon man pagkat-on sa bata pagbuhat sa maayo kon ikiha sa parents ang titser kay gilusi ang dalunggan niini dihang nagpabadlong-nakasala sa ilang classroom?

Unsaon pagkamatngon sa bata nga sayop ang  gihimo dihang pag-wild niya sa ilaha, diin gipanglabay mga dulaang nabuak ug miliki tv screen nga naigo, kon ang inahan mipugong sa mga kamot nga nagdalag disiplina, dihang bunalan na kini sa amahan sa linukot nga papel aron lamang pagpahiamgo nga sayop ang iyang gibuhat?

Pagbunal? Pagpasakit? Kabahin ba kini sa disiplina? Aw, oo, kabahin kaayo.

Remember, unsay gibuhat ni Hesus dihang gihimo sa mga magpapatigayon nga tindahan ang balaang balay sa Iyang Amahan?

Gipangtuwad Niya ang mga lamesa ug pinaagi sa solidong pisi, Iyang gibunalan ug gibugaw ang mga mananap.

Silang Eba’g Adan, human makasala, dili ba gipalayas sa Ginoo? Matang sa disiplina, nga mas sakit pa kay sa bunal ug lusi sa dalunggan?

Tiaw bay, gumikan sa ilang sayop, giitsa puwera sila sa langit?

Ug kita nahimong bunga sa ilang pagpakasala. Gipakatawo tang makasasala daan. Unya, ato pang gidungagan! Ngano man ni?

Tungod kay ang mga sagbot sa katilingban, kinsa pulos produkto sa dili kaantigo mamunal nga ginikanan, nga gustong hiposon ni Tatay Digong, labanan man sa taga Human Rights, diin imbes motabang pag-discourage ning nangayabag na sa shabu aron dili na magpakasala, daw giawhag hinuon, nga hala sige, padayon sa pagpakasala!

Ang Ash Wednesday adlaw nga human sa pagsaulog sa Pasko, Bag-ong Tuig ug Sinulog, gitanyagan na usab kita sa Kahitas-an og laing kahigayonan sa pagbag-o sa atong kinabuhi. Ning higayona, abo na gyod sa kaluwasan maoy Iyang gi-offer natong tanang makasasala.

Andam ka na ba pagsunod sa way of life ni Jesus Christ, aron kita mahisama ni Dimas, kinsa Iyang giingnan: “Karon, karon dayon…mahiuban ka nako sa Paraiso?”