Duna pay daghang druga sa Sugbo

Mora og nagtubod sa suplay sa ginadiling druga ang Sugbno karong panahona.

Kini taliwala usab sa mga dagkong bulto sa shabu nga nasakmit sa otoridad sa ilang mga operasyon sa dakbayan sa Sugbo ug sa lalawigan.

Ang daghang druga nga nakuha sa otoridad niining gipakusgan nga gubat batok sa maong ilegal nga negosyo nagpakita lamang sa makalilisang ug grabe ka kaseryoso nga problema nga nag-uyog sa nasud karon.

Sa Sugbo, daw dili kita makatuo sa minilyon nga kantidad sa droga nga nakuha sa otoridad sa ilang mga operasyon sukad pa sa Enero.

 Usa sa labing dako niini kadtong operasyon sa kapulisan diin ilang nasakmit ang dili momenos P190 milyones nga kantidad sa shabu sa dakbayan sa Sugbo ug sa lungsod sa Consolacion.

Hinuon, mora’g dili lamang kini mao. Nangagpas ang otoridad nga daghang pang druga ang nagbaha sa Sugbo.

Gani nagtuo sila nga adunay dakong network sa sindikato ang naglihok sulod sa lalawigan ug kasikbit nga mga dapit.

Gani atong mahinumdoman ang pamahayag ni Presidente Rodrigo Duterte kaniadto nga ang problema sa ilegal nga druga sa Sugbu hilabihan ka seryoso nga ang probinsiya maoy nanguna sa listahan sa mga lugar nga apektado niini.

Bisan pa sa gipakusgan nga kampanya batok sa druga, matud sa kapolisan nga mas agresibo usab karon ang mga sindikato tungod kay makigtigi kuno sila karon sa otoridad pinaagi sa paggamit og armas aron pagpanalipod sa ilang patigayon.

Sa niaging semana, Si Chief Superintendent Debold Sinas, ang director sa Police Regional Office-7, mipahimangno sa kapolisan kabahin sa presensiya sa Sugbo sa mga gun-for-hire gikan sa dakbayan sa Ozamiz kansang misyon mao ang pag-liquidate sa mga polis dinhi.

Hinuon mitambag si Sinas sa iyang mga sakop sa pag-amping kanunay.

Kung wala pa gipakusgan ang kampanya batok sa druga sa administrasyon ni Duterte, dili unta nato mahibaw-an ang giladmon sa maong ilegal nga negosyo sa nasud.

Ug nanghinaut lamang kita nga magpadayon pa ang dakong opensiba batok niini.