Sayup ang gidak-on sa gibaligya nga bahin sa yuta
Dear Atty. Divine,
Duna koy pangutana labot sa property nga na-inherit sa akong papa nga iya ra sab gibaligya sa iyang maguwang. Ang nahibaw-an sa akong papa nga ang ilang bahin tag 100 square meters lang matag usa kanila unya walo sila ka magsuon. Busa tungod sa kagamay sa ilang bahin nakadesisyon si papa ug ang uban niyang mga igsuon nga ibaligya ang ilang share ug gipalit kini sa ilang kamaguwangan.
Apan nahibaw-an later on sa akong papa pinaagi sa Assessor’s Office nga dili diay 100 square meters lang ang ilang bahin matag usa kondili tag 800 square meters ug mao sab kini ang gisulti sa ilang uyuan. Ang akong pangutana kun pwede pa ba bawion sa akong papa ang sobra kay 100 square meters ra man ang iyang gibaligya? Ug wa sab silay gipirmahan nga Deed of Sale alang sa pagbaligya? Unsay angayan niyang buhaton? Daghang salamat.
Cleo
* * *
Dear Cleo,
Kun duna moy ebidensya nga mopamatuod nga 800 square meters ang bahin sa imong papa ug sa iyang mga igsuon ug 100 square meters ra ang gibaligya sa imong amahan ngadto sa iyang igsuon then mamahimong bawi-on sa imong papa ang sobra sa iyang gibaligya. Mas maayo nga inyong ipasukod gyud ang property aron mahibaw-an ang actual nga gidak-on kay ang land area nga anaa makita sa tax declaration usahay dili sab accurate. So kun inyong ma-confirm ang land area then mas maayong makigsulti ang imong papa sa iyang igsuon nga gibaligyaan ug iyang sultian nga kuhaon niya ang sobra niini.
Kun dili sab ibalik sa igsuon sa imong papa then mamahimo siyang mopasaka og reklamo batok sa iyang igsuon. Apan kun ang pagbaligya sa imong papa sa iyang share way pinirmahan nga Deed of Absolute Sale or any nga mopamatuod sa pagbaligya then makonsiderar nga dili balido ang maong pagbaligya og mamahimong bawion sa imong papa ang property kay basi sa balaod ang pagbaligya og real property kinahanglan gyud nga in writing, pirmado sa nagbaligya og dapat notarized ang maong dokumento. Thanks and God bless.
Atty. Divine
* * *
Alang sa inyong pangutana, ipadala lang pinaagi sa email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.
- Latest
