Nangutana ni Ngo
Ang pagsige og awhag sa Cenore Corporation sud na ron sa dul-an duha ka tuig nga dasonan sa Mandaue City Council ang ilang pagbanos sa pag-abang sa 1.4 ka ektaryang luna sa North Reclamation Area nga kanhi gihuptan sa Katumanan Hardware maoy nakadani sa pagtagad sa City Hall sa kuwestiyonable nga mga aspeto sa transaksiyon.
Nangangkon si Mandaue City Mayor Luigi Quisumbing nga unang niduol niya ug sa mga konsehal sa Mandaue si Roderick Ngo, ang tag-iya sa Cenore, ug ubang nangangkon nga mga ahente sa kompaniya niadtong 2017.
* * *
Ang tuyo nilang Ngo ug kaubanan, segun ni Quisumbing, mao ang pagpangayo og ratification sa City Council sa kauyonan sa pagtugyan sa Katumanan sa iyang katungod sa luna ngadto sa Cenore niadtong 2013 nga gipirmahan ni kanhi mayor ug karon Kongresista Jonas Cortes.
Gibutyag ning Quisumbing sa Arangkada sa DYAB Abante Pa, Bisaya! aron pagsukwahi sa bag-ong pangangkon ni Ngo pinaagi sa iyang mga abogado nga wa siya manglaktod sa mga lagda kay igo lang nituo sa pasalig ni Cortes nga wa na kinahanglana ang pagdason sa mga konsehal.
* * *
Matod ni Quisumbing nga sukad pa sa unang pagduol ni Ngo niya gidasig na nilang Cenore sa pagsud og bag-ong kauyonan kay ang mga dokumento nga gihuptan sa Mandaue City government nagpakita pa nga ang Katumanan Hardware maoy nag-abang sa luna.
Nipuno si Quisumbing nga nagpatabang siya ni Ngo pagkumbinser sa Katumanan Hardware sa pormal nga pagpahibawo sa City Hall nga ila nang gitugyan sa Cenore ang luna.
Apan gibalibaran siya ni Ngo nga wa siyang kahibawo hain nang taga Katumanan.
* * *
Niadtong Disyembre sa niaging tuig, nadawat ni Quisumbing ang sinuwat nga pamahayag sa presidente sa Katumanan nga si Elbert Paragoso nga di na sila interesadong mopadayon sa pag-abang sa luna. Nganong gusto na mang kalimtan ni Ngo si Paragoso?
Tinuod ba nga di boluntaryo ang pagtahan ni Paragoso sa luna? Kay nabiktima lang sa sobrang pagsalig ni Ngo nga nagpatuong nikalawat sa mga pagtulon-an sa iyang gipangulohan nga Brotherhood for Christian Businessmen and Professionals (BCBP)? Mahimo bang motingog na si Ngo ug momatuod nga “he can be honest even if others are not”?
* * *
- Latest
