Salawahang anak, kontrabida sa buhay ng ama!
BUMALIK sa aming action center ang asawa ng ni-rescue naming matanda sa Quezon City. Humihingi ng tulong dahil nakaratay sa ospital ang kanyang asawa at hindi makalabas.
Kung matatandaan ninyo, binawi ng aming grupo si Lolo Narciso at binalik sa kanyang tirahan sa Malabon. Nanawagan ang matanda na i-rescue siya dahil ayaw niya sa poder ng kanyang anak. Wala kasi siyang magawa o makausap man lang doon.
Problema naman ngayon ang patung-patong na gastusin sa pagpapagamot ni Lolo. Kulang sa pera ang mag-asawa at ayaw tumulong ng salawahang anak sa mga gastusin. Ipit ngayon sa ospital ang matanda.
Kinausap ko sa telepono ang inirereklamong anak. Nagbakasakali kaming mabago ang masama niyang puso.
Nagmatigas ang loko. Walang pakialam sa kapakanan ng sarili niyang ama. Nagbunton pa ng sisi sa kanyang stepmother. Gustong palabasin na kasalanan pa namin dahil ni-rescue si Lolo.
‘Di na inisip na anumang oras ay puwedeng bumigay ang pobreng matanda. Napakamalas naman ni Lolo at ganito ang kanyang anak – bastos at matigas ang ulo.
Mabuti pa ang ibang mga kamag-anak ni Lolo, bukal sa puso ang pagtulong. Kaso nga lang, hinaharang naman nitong magaling na anak. Gusto yatang matuluyan ang ama niya, tapos ibubunton ang sisi sa stepmother.
Lahat tayo ay tatanda at darating sa punto na babawiin ng Panginoon ang buhay na ipinahiram sa atin. Huwag naman sanang sa paglisan ng ating mahal sa buhay, may baon pa itong poot at sama ng loob.
Pamilya lang din ang nagtutulungan sa oras ng pangangailangan. Inaruga tayo ng ating mga magulang; suklian natin ang pagmamahal at pag-aaruga nila sa atin.
Nakasaad sa Bibliya, Honor thy Father and thy Mother. That’s the fifth commandment. Para gumanda ang iyong buhay, galangin, sundin at alagaan ang mga magulang. Mahalin hindi patayin.
Nawa’y tumagos ito sa masamang puso ng anak ni Lolo Narciso. Habang ‘di pa huli ang lahat. Tapos kapag nawala na ang ama niya sa mundong ito, iiyak-iyak. Sisipain ko siya sa lalamunan.
- Latest
