EDITORYAL - Kompetensiya sa mga Pinoy skilled workers

Ang mga proyekto ba sa gobiyerno nga gigastohan pinaagi sa utang ngadto sa ubang nasud kinahanglan gyud nga dunay mga langyaw nga empleyado bisan og mahimo ra sa mga trabahador nga Pilipino?

Mao kini ang gituki karon sa Senate committee on economic affairs inquiry bahin sa “Build, Build, Build” project sa administrasyong Duterte human nasayran nga daghan na karong mga proyekto sa gobiyerno nga ang pundong gigamit inutang gikan sa China, dunay daghang mga Chinese workers nga nakatrabaho.

Ang Department of Labor and Employment miingon nga dili gyud unta ingon niini. Matud pa nga kun ang trabaho kaya sa mga Pilipino dili na kinahanglang mga langyaw pa nga trabahante maoy paanhion aron maoy patrabahoon.

Ang Department of Public Works and Highways mibutyag nga ang kasamtangang Chinese-funded Binondo-Intramuros ug Estrella-Pantaleon bridges projects nga aduny 140 ka mga trabahante, 30 porsiyento niini pulos mga Chinese skilled laborers.

Ang pangutana, wala bay ‘skilled laborers’ nga mga Pilipino nga pwede aning mga trabahoa? Mura naman hinuon nga kakompetinsya sa mga Pilipino ang mga Chinese dinhi pa sa kaugalingon niining nasud.

Giklaro hinuon ni Finance Secretary Maria Edita Tan nga dihang gihimo pa ang negosasyon sa pagpangutang sa Pilipinas og pundo alang niini nga mga proyekto way kasabotan nga kinahanglang duna gyuy mga Chinese workers nga makatrabaho ug kun duna man mag-agad kini sa kontrata.

Gawas pa niana, ang pundo nga gigamit para aning mga proyektoha wala man pangayoa kondili giutang man sa Pilipinas gikan sa China ug may interes pa.

Sa ato pa, dili kinahanglan o obligado ang Pilipinas nga manguha og Chinese workers nga patrabahoon ani nga mga proyektoha.

Tingale depende sa trabaho, apan dili katuohang way skilled Pinoy workers nga di makamao sa nahibaw-an sa mga Chinese skilled workers.

Angay tingaling klaruhon sa mga negosasyon ug kasabotan kining isyuha aron way masilo. Ilabi na nga daghang mga Pilipino ang nagkinahanglan og trabaho.