Makapuntos gyud

Dako karon ang tsansa sa mga lokal nga kandidato dinhi sa Sugbo nga giendorsar pinaagi sa pagisa ni Pres. Duterte sa ilang mga kamot atol sa political campaign rally sa PDP-Laban sa Plaza Independencia sa Dakbayan sa Sugbo adtong adlaw nga Domingo.

Si Duterte mianhi aron suportahan ug ikampanya ngadto sa iyang mga dumadapig ang mga PDP-Laban senatorial candidates pinangulohan ni kanhi special assistant to the president Christopher “Kuya Bong” Go, Koko Pimentel, Ronald “Bato” Dela Rosa, Dong Mangudadatu, ug Francis Tolentino.

Apil sab sa iyang gihangyong pabotaran ang ilang guest candidates, ang uban kanila beterano na samtang ang uban bag-o pa sama nalang sa folk singer nga si Freddie Aguilar.

Apan gikahinaman pag-ayo ug giatangan niadtong adlawa sa lokal nga mga supporters kun kinsa nga mga local candidates ang i-endorsar ni Duterte diha sa entablado.

Samtang tuod adunay ubang kandidato nga diha lang sa kilid-kilid nagpahulagway kauban ni Duterte  nga niisa sa ilang mga kamot (wala sila pasakaa og apil sa stage), apan para kanila “mao na kato” ang pagtuboy kanila sa pangulo.

Nangindahay silang makakuha sab og suporta sa mga local supporters ni Duterte dinhi. 

Sa motuo pa ug sa dili, dako gyud kadto nga puntos para sa mga lokal nga kandidato.

Sama nalang kang Bise Mayor Edgardo Labella dinhi sa Dakbayan sa Sugbo nga gi-endorsar gyud mismo ni Duterte diha sa entablado kauban ang kontrobersiyal nga si kanhi mayor Michael Rama.

Apan pinaagi kaha sa pagisa sa iyang kamot ni Duterte mobotar sab kaha ang mga supporters sa presidente dinhi ngadto kaniya?

Dako kaayo ang purohan ilabi na kun rekord  sa pagpanerbisyo sa publiko maoy basehan.

Maayong himuong giya sa mga publiko pagpili sa kandidato,  dili kung kinsa o kang kinsang pamilya gikan ang kandidato. 

Kondili tan-awon gyud ang kaligdong ug kalimpyo sa pagkatawo niini.

Kadtong wala mosikat tungod sa mga kahiwian, kontrobersiya, kabangis ngadto sa mga kabus, garapalan kung mangilad sa mga botante, manggamit sa kahimanan ug pundo sa publiko alang sa kaugalingong interes o pagpamalit og botos ug uban pa.

Gawas pa mas labing maayong hiyas sa angay botaran kadtong sayon rang duolon ug dili sab mapahitas-on.

Kadtong dili lamang kutob sa estorya nga sila nagmahal sa mga konstituwente apan sa pagkatinuod dili gani maduol.