Siloti gyud

Human sa dugay na gyud kaayong katuigan nga gipasagdan ra ang tinonto sa  tag-iya sa dakong piggery sa lungsod sa San Fernando, karon giaksyonan na gyud tawon sa kagamhanan ug gidakop ang tag-iya ug mga sakop.

Gibunyagan na lang gud tawon og Sitio Baho, ug usahay Baryo Baho, ang dapit nga duol sa piggery kay pwerteng bahoa gyud. Kon moagi ka diha, masimhot gyud nimo ang lang-og kaayong baho sa mga hugaw sa baboy.

Mao diay nga baho kay samtang duna kunohay sila’y pundohanan sa mga hugaw nga maoy ipakita kon mag-inspection, apan may tubo diay nga paingon sa dagat aron adto modagayday ang mga tai sa baboy.

Nindota kaha kaligoan sa dagat dihang dapita no? Mga walay uwaw kining mga tawhana.

Nakaako sila sa paghugawhugaw sa atong kadagatan. Maayong iitsa sa nag-green nga tubig ang tag-iya sa piggery.

* * *

Salamat ni Konsehal Jerry Guardo, ang deputy mayor for infrastructure, kay nakig-coordinate gyud siya sa opisina sa city engineer aron nga mapasemento na ang gubaong karsada sa Villalon Drive paingon sa Oppra, sakop sa Capitol Site.

Apan yuna pa, maayo tingali unta nga panggub-on usa ang mga illegal structures nga anaa mi-encroach na sa sidewalk ug karsada aron nga molapad na ang agianan sa mga sakyanan.

Wala gyud ko mobilib niining Kapitan Manuel Guanzon kay dugay na kaayo siya nga kapitan diha sa Capitol Site apan naghinan-aw lang sa binuang sa mga nagpuyo daplin sa karsada.

Mora lang og buta kini si Kapitan Guanzon nga wala makakita sa mga angayang tagdon isip opisyal sa barangay.

* * *

Daghana diay sa mga tawo nga gustong makakat-on pagsulti og pinulongan nga Hinapon uy. Wala magtuo si Mayor Tomas Osmeña ug si City Librarian Rosario Chua nga daghan diay kaayo ang gustong makamao nga mosulti og Nihongo.

Ang klase nga himoon kada Sabado ug Domingo, magsugod karong Marso 2 ug matapos unya sa Hulyo 30. Giingnan ko ni Ma’am Chua nga kon mahuman na kining maong Japanese language, makamao na gyud nga mag-Hinapon.

Usa na ako sa gatusan ka tawo nga nag-ambahan paingon sa City Library aron  makapahimulos sa libre nga Japanese Language Lesson. “Watashi wa Nihongo wo benkyo shimasu.” Hehehe, sugdan dayon nato ang pag-Hinapon. Joke ra bitaw.

Bitaw, kanang Hinapon nga mga pulong nga anaa sa ibabaw, ang kahulogan niana nga moeskwela ko og Japanese  language. Sige, alang sa mga giswerte nga naapil sa 50 nga first batch, congrats. Salamat, Mayor Tomas Osmeña.