Nganong kalit nga nitak-om
Nahibung ang mga paryente ni Ashley Abad, ang 19 anyos nga giingong namatay tungod sa overdose sa ecstasy sa bisperas sa Sinulog sa Dakbayan sa Sugbo sa niaging buwan, pagkahibawo nila nga ang hinigugma nga si Nel Spencer Tiu, nga wa pakita bisan sa gisubli-subli nga imbitasyon sa kapolisan, niadto na sa Cebu City Police Office (CCPO).
Ang tinubdan sa ilang kasayuran mao si Atty. Orlando Salatandre, abogado ni Tiu, nga ilang nadunggan nga gikahinabi sa programa nga Arangkada sa DYAB Abante Pa, Bisaya! niadtong Lunes sa buntag.
* * *
Pila ka oras human nasibya ang pahibawo ni Salatandre, nitug-an si Heneral Debold Sinas, hepe sa Police Regional Office sa Central Visayas, nga niatubang na si Tiu ni CCPO Chief Royina Garma ug pormal nang nihimakak nga siya ang naghatag og ecstacy ni Abad.
May sukaranan ang kahibung sa mga Abad. Nganong ang mga opisyal sa kapolisan, nga nagsige og pasidaan nga ikiha nila si Tiu kun di gyud magpakita, nikalit man lang og kahilumon sa dihang niatubang na si Tiu nila? Nganong naunhan na man hinuon sila ni Salatandre?
* * *
Kay di man live ang Arangkada (gi-record sa among pinuy-anan), nahinabi nako sa telepono si Salatandre niadtong Domingo sa gabii.
Siya ang niboluntaryo sa kasayuran nga wa moluwat og subpoena ang kapolisan kay nipakita na ang iyang kliyente.
Samtang wa motug-an si Garma sa panag-atubang nilang Tiu, nipasumbingay siya nga mahimong wa na kinahanglana ang subpoena kay dunay “development” sa ilang imbestigasyon.
Nganong wa man dayon itug-an ni Garma sa mga Sugbuanon ang iyang pakigsulti ni Tiu?
* * *
Duna koy napanid-an nga kalainan sa mga pahibawo nilang Salatandre ug Sinas:
• Niingon si Sinas (nga wa sa CCPO headquarters niadtong higayona) nga niatubang si Tiu kang Garma niadtong Pebrero 13, apan si Salatandre (nga nikuyog ni Tiu ug sa iyang mga ginikanan) niingon nga nag-atubang sila sa Valentine’s Day; ug
• Niingon si Sinas nga gipanghimakak ni Tiu nga siya ang tinubdan sa ecstacy nga nakapatay ni Abad, apan si Salatandre niingon nga wa maghisgot si Tiu og ecstacy kay wa man sab siya pangutan-a ni Garma mahitungod sa giingong presensiya sa ecstacy atol sa ilang gitambongan nga party.
* * *
- Latest
