Supak pagpaubos sa age of criminal liability

Pahayag batok sa pagpaubos sa edad nga mag-atubang og kriminalidad dili makatabang alang sa mga batan-ong mananagat

Kaming mga gagmay’ng mananagat sa Tañon Strait hingpit nga misupak pagpaubos sa edad nga mag-atubang og krimen tungod kay dili kini makatabang alang sa mga batan-ong mananagat.

Daghan sa mga gidili nga balaod diha sa mga lagda sa pangisda nga apil ang silot kriminal.

Sumala sa atong nahibaw-an daghang mananagat nga mapasagaron nga gigamit ang ka-inosente sa kabataan sa ilang mga dautang binuhatan sama sa pagpanagat gamit ang dinamita kasagaran kanila magsugo sa ilang mga anak sa pagluto sa fertilizer ug pagbutang sa blasting caps.

Kasagaran niining mga bataa mituman lamang sa sugo sa ilang mga ginikanan o mahimong duwa-duwa lamang alang kanila apan ang mata sa balaod usa kini ka kriminal nga buhat. Ang paghupot sa dinamita ug mga sangkap niini usa ka kriminal nga kalapasan.

Kasagarang mga anak sa mananagat kuyogon ang ilang mga anak aron makatabang. Usa sa ilang mga gimbuhaton mao ang pagpanguha’g isdang binutha’g dinamita ug pagpamaligya sa ilang kuha. atong hinumduman, ang Fisheries Code nagsilot bisan sa paghupot ug pagbaligya og isdang binuthan.

Unsaon nalang ang mga anak sa mga kabus nga mananagat kun sila masakpan? Ang kinahanglang manubag mao ang ilang mga ginikanan nga nagpasipala sa ka-inosente sa  kabataan.

Imbes nga paubsan ang edad nga mag-atubang sa kriminalidad, angay silang tabangan pag-edukar ug hataga’g kahigayonan nga makatrabaho.

Seryusohon pagpatuman ang Fishery Code nga walay kahadlok o pagdapig batok sa mga komersyal nga panagatan sulod sa ‘municipal waters’ aron dili mapugos ang gagmay’ng mananagat mogamit og ilegal nga pamaagi sa panagat. Hatagan og dugang panginabuhian ang mga gagmay’ng mananagat ilabi na ang mga taga isla diin kulang ang kahigayonan.

Hugtan ang regulasyon sa ammonium nitrate fertilizer  nga gigamit paghimo’g dinamita. Angay bilanggoon ang mga mananagat nga nigamit sa dinamita, apan dili apilon ilang mga anak.  Ang kabataan nga nagpanuigon sa 12 anyos nagduwaduwa pa lamang kini. Wala  siya’y katuyoan nga maghimo’g salaod. Wala sila’y nasabtan sa balaod ilabi na kadtong wala maka eskwela.

Kami naghangyo sa tanang sakop sa Kongreso nga tan-awon ang mga mata sa ilang mga batan-ong anak ug mga apo. Bisan dako ang kalainan sa ilang kahimtang kay sa mga anak sa mga mananagat, ang ilang pagka inosente susama ra, ang kalainan lang mao nga silan anak sa mga mananagat nga labaw’ng huyang ug walay gahum. Ven Carbon